जनकपुरधाम, ४ असोज । चुरे र वनजंगल संरक्षण अभियानलाई संस्थागत गर्दै नयाँ युवा संगठन ‘युथ फर नेचर’ गठन गरिएको छ ।

शनिबार नेपाल पत्रकार महासंघ धनुषामा आयोजित पत्रकार सम्मेलनमार्फत संगठनको औपचारिक घोषणा गरिएको हो ।

संगठनले सबैलाई सदस्य बनाउने व्यवस्था राख्दै विभिन्न कार्यक्रम सञ्चालनका लागि मात्र संयोजक तोक्ने प्रावधान ल्याएको जनाएको छ । सम्मेलनमा बोल्ने नेताहरूले सरकार चुरे संरक्षणको मुद्दामा असंवेदनशील र भ्रष्टाचारपूर्ण रहेको भन्दै युवाहरूमा गहिरो असन्तुष्टि बढेको बताए ।

संगठनले अघि सारेका राजनीतिक मागमा प्रदेशमा अन्तरिम सरकार गठन गरी सानो मन्त्रीपरिषद् विस्तार, प्रत्यक्ष निर्वाचित प्रधानमन्त्री र मुख्यमन्त्रीको व्यवस्था, साथै स्थानीय तहको निर्वाचन गैरदलीय आधारमा हुनुपर्ने समावेश छ ।

चुरे संरक्षणसम्बन्धी मागमा चुरेभावर क्षेत्रलाई संरक्षित क्षेत्र घोषणा गर्न, प्राकृतिक स्रोतको अनियन्त्रित दोहन रोक्न, चुरे क्षेत्रका नदीमा चरणबद्ध चेक ड्याम निर्माण गर्न र वन संरक्षणका लागि विशेष फोर्स गठन गरी डिभिजन वन कार्यालय अन्तर्गत राख्नुपर्ने आवश्यकता औँल्याइएको छ ।

संगठनले आफ्ना माग चाँडै सम्बोधन नगरिएमा भ्रष्टाचार र कुशासनविरुद्ध प्रतिकार आन्दोलनमा उत्रन बाध्य हुने चेतावनीसमेत दिएको छ । यस्तै, जेनजी पुस्ताले उठाएका सम्पूर्ण जायज मागलाई समर्थन गर्ने पनि स्पष्ट गरिएको छ ।

कार्यक्रमको अवसरमा २३ र २४ गते शहादत प्राप्त गरेका युवा विद्यार्थीहरूलाई श्रद्धाञ्जली अर्पण गरिएको थियो । सहभागिहरूले चुरे संरक्षण र न्यायपूर्ण राजनीतिक प्रणालीको लागि निरन्तर संघर्ष गर्ने प्रतिबद्धता व्यक्त गरेका छन् ।