जनकपुरधाम, ३ असोज । मधेश प्रदेश सभाको बैठक सञ्चालन गर्ने विषयमा शुक्रबार मुख्यमन्त्री सतिश कुमार सिंह र सभामुख रामचन्द्र मण्डलबीच भेटवार्ता भएको छ ।

मुख्यमन्त्रीको आवासमा भएको भेटमा हालैको जेनजी आन्दोलनका क्रममा प्रदेश सभा सचिवालयसहित सरकारी संरचनामा भएको आगजनी, तोडफोड र लुटपाटपछि उत्पन्न समस्या तथा समाधानबारे विस्तृत छलफल गरिएको थियो ।

सभामुख मण्डलको सचिवालयका अनुसार भेटमा प्रदेश सभा सञ्चालनका लागि तत्काल आवश्यक पर्ने भौतिक संरचना निर्माण, क्षतिग्रस्त सामग्रीको व्यवस्थापन र सभा सचिवालयलाई पूर्ण रूपमा कार्यशील बनाउनुपर्ने विषयमा पनि चर्चा भएको छ ।

दुवै शीर्ष नेताले प्रदेश सभाको बैठक छिटो सञ्चालन गर्न आवश्यक पूर्वाधार पुनःनिर्माणलाई प्राथमिकतामा राख्ने प्रतिबद्धता व्यक्त गरेका छन् ।

गत भदौ २३ र २४ गते भएको जेनजी आन्दोलनका क्रममा जलेर नष्ट भएका फर्निचर, कम्प्युटरलगायतका सामग्रीका कारण प्रदेश सभाको नियमित कार्य अवरुद्ध भएको छ ।