जनकपुरधाम, ३ असोज । संविधान दिवसका दिन संघीय लोकतान्त्रिक मोर्चाले जनकपुरधाममा विरोध कार्यक्रमसहित असोज ३ लाई कालो दिवसका रूपमा मनाएको छ ।

२०७२ साल असोज ३ गते संविधान जारी भएपछि नेपालमा हरेक वर्ष यो दिन संविधान दिवसका रूपमा मनाइँदै आएको छ । तर, मधेशवादी दलहरू आवद्ध मोर्चाले भने शिरमा कालोपट्टी बाँधेर सडकमा विरोध जनाएका हुन् ।

विरोध कार्यक्रममा सहभागी तराई मधेश लोकतान्त्रिक पार्टीका नेता उमेश मण्डलले मधेशीहरूमाथि गोली हानेर संविधान जारी गरिएको भन्दै असोज ३ मधेशी जनताका लागि कालो दिन भएको टिप्पणी गरे । उनले भने, ‘अब संविधान संशोधन मात्रले पुग्दैन, संविधान पुनःलेखन आवश्यक छ । जबसम्म संविधान पूर्ण हुँदैन, आन्दोलन जारी रहनेछ ।’

मोर्चाका कार्यकर्ताहरूले ‘असोज ३ कालो दिन’, ‘ब्ल्याक डे’ लगायतका प्लेकार्ड बोकेर प्रदर्शन गरेका थिए । उनीहरूले वर्तमान संविधानले मधेशी समुदायको हक अधिकार सुनिश्चित नगरेकाले असन्तुष्टि बढेको दाबी गरे ।

संविधान दिवसकै दिन देखिएको यो फरक प्रतिक्रिया मधेशी समुदाय र केन्द्रबीचको असन्तुष्टि अझै समाधान हुन नसकेको संकेतका रूपमा लिइएको छ ।