जनकपुरधाम, ३ असोज । संविधानको रक्षा र लोकतन्त्र सुदृढीकरणमा सबै पक्षको सहभागिता अपरिहार्य रहेको एक कार्यक्रमका वक्ताहरूले बताएका छन् ।

जनकपुरधाममा कायापलट र नेपाल पत्रकार महासंघ धनुषाको संयुक्त आयोजनामा ‘लोकतान्त्रिक आन्दोलन ः संविधान र पत्रकारिता’ विषयमा भएको विचार–विमर्शमा सहभागीहरूले लोकतान्त्रिक मूल्य र संविधानलाई जोगाउन पत्रकारिताको महत्वपूर्ण भूमिका रहेको धारणा राखेका हुन् ।

कार्यक्रममा संविधानको सीमाभित्र रहेर समस्याको समाधान खोज्नु आजको आवश्यकता भएको भन्दै युवाहरूलाई नीति, कानून र न्यायोचित मार्गप्रति आलोचनात्मक विश्लेषणमार्फत अघि बढ्न आह्वान गरियो ।

यस्तै, जनकपुरका कानुन अध्ययनरत तथा सचेत युवाहरूले स्वस्फूर्त रूपमा सञ्चालन गरेको ‘मधेश पुनर्जागरण अभियान’ मा समेत वक्ताहरूले सहभागिता जनाउँदै विचार प्रस्तुत गरे । मधेशमा विकास, समावेशिता र पहिचानप्रति केन्द्रित छलफलहरूले स्थानीय युवाहरूको गम्भीरता र सक्रियताप्रति सकारात्मक सन्देश दिएको बताइयो ।

दुवै फोरममा अग्रजहरूको मन्थन सुन्ने र युवाहरूले आफ्ना विचार प्रस्तुत गर्ने अवसर पाएका कारण सहभागीहरू उत्साहित बनेका थिए । छलफलमा युवाहरूको बढ्दो मनोबलले लोकतन्त्र, संविधान र सामाजिक न्यायप्रति अझ ऊर्जा जगाएको सहभागीहरूको भनाइ छ ।

वक्ताहरूले लोकतन्त्रलाई मजबुत बनाउन निरन्तर छलफल, सक्रिय सहभागिता र सामूहिक समर्पण आवश्यक रहेकोमा जोड दिएका थिए ।