जनकपुरधाम, ३ असोज । सामुदायिक परिवार कल्याण संघको २६औं वार्षिक साधारणसभा शुक्रबार जनकपुरधामस्थित संघकै कार्यालयमा सम्पन्न भएको छ ।

साधारणसभामा संघका पदाधिकारी, पूर्व पदाधिकारी तथा आमन्त्रित अतिथिहरूको उपस्थिति रहेको थियो । कार्यक्रममा विगत वर्षभर संघले सञ्चालन गरेका गतिविधिहरू, आगामी योजनाहरू तथा संगठन सुदृढीकरणका विषयमा छलफल गरिएको संघका पदाधिकारीहरूले जानकारी दिए ।

साधारणसभाले स्वास्थ्य, परिवार नियोजन, महिला सशक्तीकरण र सामुदायिक विकासका क्षेत्रमा संघले महत्वपूर्ण योगदान दिँदै आएको मूल्याङ्कन गरेको छ । साथै आगामी दिनमा सेवाग्राहीलाई अझ प्रभावकारी कार्यक्रममार्फत लाभ पुर्याउने प्रतिबद्धता जनाइएको छ ।

संघका पदाधिकारीहरूले सामुदायिक स्तरमा परिवार कल्याणसम्बन्धी सचेतना अभिवृद्धि गर्न सबै पक्षको सहकार्य अपरिहार्य रहेको भन्दै संघले प्रदेश र स्थानीय तहसँग साझेदारीमा कार्यक्रम विस्तार गर्ने योजना पनि सार्वजनिक गरेका छन् ।