जनकपुरधाम, ३ असोज । सशस्त्र प्रहरी धनुषाले ठूलो मात्रामा लागूऔषध बरामद गरेको छ । विदेह नगरपालिका–३ गोबराहीस्थित बाँसघारीमा लुकाइ राखिएको करिब ८३५ किलो गाँजा सशस्त्र प्रहरीले नियन्त्रणमा लिएको हो ।

सशस्त्र प्रहरी बल, नेपाल नम्बर २ गण जनकपुरधामबाट खटिएको टोलीले विशेष सूचनाको आधारमा बिहीबार राति बाँसघारी क्षेत्रमा खोजतलास सञ्चालन गर्दा गाँजा फेला परेको हो । ठूलो परिमाणमा बोरा भरी राखिएको गाँजा लुकाइएको अवस्थामा बरामद गरिएको सशस्त्र प्रहरीले जनाएको छ ।

बरामद गाँजा आवश्यक कानूनी प्रक्रिया पूरा गरी राजस्व अनुसन्धान कार्यालय जनकपुरधाममा बुझाउने तयारी गरिएको प्रहरीले जनाएको छ । घटनासम्बन्धी थप अनुसन्धान भइरहेको छ ।

स्थानीयवासीले सीमावर्ती क्षेत्रमा लागूऔषधको खेती र कारोबार बढ्दै गएको भन्दै प्रहरी प्रशासनले अझ सक्रियता देखाउनुपर्ने आवश्यकता औंल्याएका छन् ।