जनकपुरधाम, ३ असोज । नेकपा एमालेका सचिव रघुवीर महासेठले हालै सम्पन्न जेनजी आन्दोलन योजनाबद्ध षड्यन्त्रका कारण हिंस्रक बनेको दाबी गरेका छन् ।

गृहनगर जनकपुरधाममा पत्रकारहरूसँग कुरा गर्दै महासेठले आन्दोलनका क्रममा भएको आगजनी, तोडफोड र लुटपाटमा जेनजी युवा प्रत्यक्ष संलग्न नरहेको स्पष्ट पारे ।

उनका अनुसार युवाहरूले भ्रष्टाचार अन्त्य, सुशासनको सुनिश्चितता र सामाजिक सञ्जालमाथिको प्रतिबन्ध हटाउनेजस्ता जायज मागहरू उठाए पनि आन्दोलनलाई नियोजित रूपमा हिंस्रक बनाइयो ।

‘युवाहरूको उद्देश्य सत्ता परिवर्तन वा नेताहरूको घरमा आगजनी गर्नु थिएन । लोकतन्त्र समाप्त पार्ने नियतले केही शक्तिहरूले आन्दोलनलाई हिंस्रक बनाइदिए,’ महासेठले भने ।

महासेठले आन्दोलन चर्काउन ‘सार्प शुटर’सम्म प्रयोग गरिएको र त्यस क्रममा युवाहरूको हत्या भएको आरोप लगाए । उनले अन्तरिम सरकारलाई यसबारे छानबिन गरी दोषी पहिचान गरेर कडा कारबाही गर्न मागसमेत गरे ।

उनले नेकपा एमाले र नेपाली कांग्रेसका नेताहरूको घरमा भएको तोडफोड र आगजनीलाई ‘व्यक्तिगत रिसिइबी साध्ने प्रयास’ भन्दै आलोचना गरे । महासेठका अनुसार यस्ता घटनाले आन्दोलनको वास्तविक उद्देश्यलाई कमजोर बनाएको छ ।

महासेठले आन्दोलनप्रति सहानुभूति जनाउँदै भने, ‘न्याय सम्भव तब हुन्छ जब वास्तविक दोषीहरूलाई पहिचान गरेर कारबाही गरिन्छ । निर्दोष युवामाथि आरोप लगाएर आन्दोलनलाई बदनाम गर्नु दीर्घकालीन समाधान होइन ।’

उनले आन्दोलनपछि देखिएको असुरक्षा र अराजकताप्रति चिन्ता व्यक्त गर्दै सरकारलाई राष्ट्रिय हित र लोकतान्त्रिक मूल्य बचाइराख्न आग्रह गरे ।