जनकपुरधाम, ३ असोज । जेनजी आन्दोलनका क्रममा क्षतविक्षत बनेका मधेश प्रदेश सरकारका कार्यालयहरूको शुक्रबार उच्चस्तरीय टोलीले स्थलगत अवलोकन गरेको छ ।

प्रदेश प्रमुख सुमित्रा सुवेदी भण्डारीको नेतृत्वमा मुख्यमन्त्री सतिश कुमार सिंह, सभामुख रामचन्द्र मण्डलसहितको टोलीले आन्दोलनका क्रममा क्षति पुगेका विभिन्न मन्त्रालय तथा सरकारी अड्डाहरूको निरीक्षण गरेको हो ।

आन्दोलनका कारण प्रदेश प्रमुखको कार्यालय, मुख्यमन्त्री तथा मन्त्रिपरिषद्को कार्यालय, भौतिक पूर्वाधार तथा विकास मन्त्रालय, शिक्षा तथा संस्कृति मन्त्रालय, श्रम तथा यातायात मन्त्रालय, प्रदेश सभा भवनसहितका संरचनामा ठूलो क्षति पुगेको छ ।

स्थलगत अवलोकनका क्रममा टोलीले जलेर नष्ट भएका फर्निचर, कम्प्युटर, उपकरण तथा महत्त्वपूर्ण कागजात देखेको थियो । तोडफोड र आगजनीका कारण मन्त्रालयहरूमा नियमित सेवा सञ्चालन प्रभावित भएको छ । धेरै कार्यालय अझै पनि पूर्ण रूपमा सुचारु हुन सकेका छैनन् ।

प्रदेश प्रमुख भण्डारीले अवलोकनपछि बोल्दै क्षति भएका संरचनाहरूको छिटो पुनर्निर्माण गर्न सरकार प्रतिबद्ध रहेको बताइन् । उनले आन्दोलनका क्रममा सार्वजनिक सम्पत्तिमा गरिएको तोडफोड मुलुककै लागि दुर्भाग्यपूर्ण भएको भन्दै जिम्मेवार निकायलाई छानबिन र पुनर्निर्माणमा जुट्न आग्रह गरिन् ।

त्यस्तै, मुख्यमन्त्री सिंहले जनताले भोग्ने असुविधा न्यून बनाउन सरकार गम्भीरतापूर्वक काम गर्ने आश्वासन दिए । ‘संविधान र संघीयताको रक्षा गर्दै जनताको सेवामा बाधा नपरोस् भन्ने उद्देश्यले हामीले तत्कालका प्राथमिकताहरू पहिचान गरेका छौँ,’ सिंहले भने ।

सभामुख मण्डलले सुरक्षा संयन्त्रले सम्पदा र कागजात बचाउन नसक्नु गम्भीर कमजोरी भएको उल्लेख गर्दै आगामी दिनमा यस्ता घटना दोहोरिन नदिनका लागि स्पष्ट योजना बनाउनुपर्ने आवश्यकता औंल्याए ।

निरीक्षण टोलीसँगै प्रदेश सरकारका सचिवहरू, प्रशासनका अधिकारी तथा सरोकारवालाहरूको उपस्थिति थियो ।