जनकपुरधाम, ३ असोज । मधेश प्रदेश प्रमुख सुमित्रा सुवेदी भण्डारीले वर्तमान संविधानका उपलब्धिहरूको रक्षा गर्दै थप उपलब्धि हासिल गर्न संविधान संशोधन अपरिहार्य रहेको बताएकी छन् ।

शुक्रबार जनकपुरधामस्थित मधेश भवनमा गृह, सञ्चार तथा कानून मन्त्रालयको आयोजनामा सम्पन्न संविधान दिवस–२०८२ को विशेष कार्यक्रममा सम्बोधन गर्दै प्रदेश प्रमुख भण्डारीले आन्दोलनका क्रममा विद्यार्थीहरूले उठाएका मागहरूको समाधान गर्नु राज्यको दायित्व भएको बताइन् ।

उनले आन्दोलनका कारण ध्वस्त भएका महत्वपूर्ण संरचनाहरू पुनःनिर्माण गरी मुलुकलाई विकास र समृद्धिको गतिमा अघि बढाउन जरुरी रहेको धारणा राखिन् ।

प्रदेश प्रमुख भण्डारीले आन्दोलनका क्रममा राष्ट्रिय सम्पदाहरूमा भएको तोडफोड र आगजनीलाई ‘दुर्भाग्यपूर्ण’ भन्दै त्यस क्रममा भएको घुसपैठको छानबिन पनि हुनुपर्नेमा जोड दिइन् ।

कार्यक्रममा बोल्दै मधेश प्रदेशका मुख्यमन्त्री सतिश कुमार सिंहले संघीय शासन प्रणालीकै कारण गाउँगाउँमा विकासको लहर पुगेको उल्लेख गर्दै यसको कमजोरीलाई सुधार गर्दै अघि बढ्नुपर्ने बताए । ‘संविधान र संघीयताको रक्षाकै लागि मैले मुख्यमन्त्री पदबाट राजीनामा दिएको छैन,’ सिंहले भने, ‘प्रदेश सभाबाट विश्वासको मत लिने मेरो निर्णयलाई क्रमशः जनसमर्थन प्राप्त हुँदै जानेछ ।’

त्यसैगरी, मधेश प्रदेशका सभामुख रामचन्द्र मण्डलले लामो संघर्ष र बलिदानपछि बनेको संविधानको मूल मर्मको रक्षा गर्दै अझ थप उपलब्धिका लागि अघि बढ्नु जरुरी रहेको बताए । उनले आन्दोलनका क्रममा राष्ट्रिय सम्पदा तथा धरोहरहरूमा भएको तोडफोडलाई ठूलो सुरक्षा चुक भन्दै राज्यले ठूलो लगानी गरेर तयार पारेको सुरक्षा निकायले सम्पदा जोगाउन नसक्नु गम्भीर विषय बनेको बताए ।

यस वर्ष मधेश प्रदेश सरकारले संविधान दिवस कुनै जुलुस वा प्रदर्शन नगरी मधेश भवनमै विशेष समारोहमार्फत मनाएको हो । कार्यक्रममा प्रदेश सरकारका उच्च पदाधिकारी, जनप्रतिनिधि, कर्मचारी र सर्वसाधारणको उपस्थिति रहेको थियो ।