जनकपुरधाम, १ असोज । गत भदौ २३ र २४ गते भएको जेनजी आन्दोलनको क्रममा निधन भएका विद्यार्थी, सर्वसाधारण नागरिक तथा सुरक्षाकर्मीप्रति जनकपुरधामवासीले सामूहिक श्रद्धाञ्जली अर्पण गरेका छन् ।

बुधबार साँझ गंगासागर पोखरीको डिलमा हजारौँको संख्यामा दीप प्रज्वलन गरी श्रद्धाञ्जली सभाको आयोजना गरिएको थियो ।

कार्यक्रममा स्थानीय व्यवसायी, विद्यार्थी, महिला समूह, सामाजिक अभियन्ता र सर्वसाधारण नागरिकको उल्लेख्य उपस्थिति रहेको थियो । सहभागीहरूले दीप प्रज्वलन गर्दै शहीद आत्माको शान्तिको कामना गरेका थिए ।

सभामा वक्ताहरूले शहीदहरूको बलिदानलाई जनआन्दोलन र लोकतान्त्रिक मूल्यहरूको प्रेरणास्रोतका रूपमा स्मरण गर्दै समाजमा शान्ति, न्याय र समानताको मार्ग प्रशस्त गर्ने प्रतिवद्धता व्यक्त गरे । ‘जेनजी आन्दोलनले देखाएको साहस र बलिदानलाई कहिल्यै भुल्न सकिँदैन, यो आन्दोलनको इतिहासमा सदैव दर्ज हुनेछ,’ एक वक्ताले भने ।

कार्यक्रमले शहरको वातावरणलाई भावुक बनाएको थियो । गंगासागर पोखरी वरपर जलाइएका हजारौँ दीपले शहीदप्रति जनकपुरधामवासीको सम्मान र श्रद्धाको प्रतीकका रूपमा प्रकाश फैलाएको थियो ।