जनकपुरधाम, १ असोज । मधेश प्याब्सनले भदौ २३ र २४ गते भएको जेनजी आन्दोलनको क्रममा शहीद भएका विद्यार्थी, सर्वसाधारण नागरिक तथा सुरक्षाकर्मीप्रति श्रद्धाञ्जली अर्पण गर्न जानकी मन्दिरको प्रांगणमा श्रद्धाञ्जली सभा आयोजना गरेको छ ।

सभामा प्याब्सनका पदाधिकारी, सदस्य, विभिन्न विद्यालयका विद्यार्थी, स्थानीय युवा तथा नागरिकहरूको उपस्थिति रहेको थियो । सहभागीहरूले मौन धारण गरी शहीदहरूको सम्झनामा श्रद्धाञ्जली अर्पण गरेका थिए ।

कार्यक्रममा वक्ताहरूले शहीदहरूको बलिदानको महत्व र लोकतान्त्रिक आन्दोलनमा उनीहरूले पुर्याएको योगदानलाई स्मरण गर्दै आगामी पुस्तामा जनचेतना जगाउने संदेश दिएका थिए ।

मधेश प्याब्सनका नेताहरूले शहीदहरूको बलिदानलाई सम्मान गर्दै संगठनले सामाजिक र शैक्षिक क्षेत्रमा जिम्मेवार भूमिका खेल्ने प्रतिवद्धता व्यक्त गरेका छन् । सहभागीहरूले शहादतको महत्व, शान्तिपूर्ण आन्दोलनको मूल्य र समुदायमा एकता कायम राख्नुपर्ने आवश्यकतालाई जोड दिएका थिए ।

श्रद्धाञ्जली सभामा उपस्थितहरूले ‘शहीद अमर रहुन’ उद्घोष गर्दै बलिदानको मूल्यलाई समाजमा जीवित राख्ने प्रतिबद्धता दोर्होयाएका थिए ।