जनकपुरधाम, १ असोज । मधेश स्वास्थ्य विज्ञान प्रतिष्ठान जनकपुरधामको प्रांगणमा बुधबार साँझ जेनजी आन्दोलनका क्रममा शहादत प्राप्त गरेका शहीदहरूको सम्झनामा शोकसभा तथा दीप प्रज्वलन कार्यक्रम सम्पन्न भएको छ ।

अस्पताल विकास समितिका कर्मचारी यूनियन, प्रादेशिक अस्पताल तथा प्रतिष्ठानको इकाई समितिको संयुक्त आयोजनामा भएको कार्यक्रममा यूनियनका अध्यक्ष डा. अनिल कुमार ठाकुरको अध्यक्षता थियो ।

कार्यक्रममा सहभागीहरूले शहीदहरूको आत्माको चीरशान्ति, शोकाकुल परिवारजनप्रति गहिरो समवेदना र आन्दोलनमा घाइते भएकाहरूको शीघ्र स्वास्थ्यलाभको कामना गरेका थिए ।

कार्यक्रममा प्रतिष्ठानका उपकुलपति प्रा.डा. अंकुर साहले जेनजी आन्दोलनप्रति समर्थन जनाउँदै शोक मन्तव्य व्यक्त गरे । त्यसैगरी प्रादेशिक अस्पताल जनकपुरधामका निर्देशक प्रा.डा. जामुन प्रसाद सिंहले पनि आन्दोलनको ऐतिहासिक महत्व उल्लेख गर्दै शहीदप्रति श्रद्धाञ्जली अर्पण गरे ।

श्रद्धाञ्जली सभामा नेपाल मेडिकल एशोसिएशन जनकपुरका अध्यक्ष डा. रामजी यादव, सचिव डा. रामज्ञान यादव, अस्पताल मेट्रोन रन्जु यादव, अस्पताल प्रशासक मेनुका झा, जनकपुर नर्सिङ क्याम्पसकी कार्यक्रम संयोजक सन्ध्या दास, यूनियनका उपाध्यक्ष डा. राजेश शाह, सचिव अजित तिवारी, सल्लाहकार र अन्य पदाधिकारीसहित सयौं स्वास्थ्यकर्मीहरूको उपस्थिति रहेको थियो ।

कार्यक्रममा सहभागीहरूले एक मिनेट मौन धारण गरी शहीदहरूको सम्झनामा पुष्प तथा माला अर्पण गरेका थिए । त्यस्तै, दीप प्रज्वलन गरेर शहीदहरूको बलिदानलाई स्मरण गरिएको थियो ।