काठमाडौं, १ असोज । लोकतान्त्रिक समाजवादी पार्टी (नेपाल) ले असोज ३ गते कालो दिवस मनाउने निर्णय गरेको छ ।

पार्टी कार्यालयमा बुधबार आयोजित पदाधिकारी तथा भातृसंगठनका नेताहरूको बैठकले यस्तो निर्णय गरेको अध्यक्ष महन्थ ठाकुरले जानकारी दिए ।

बैठकपछि जारी विज्ञप्तिमा अध्यक्ष ठाकुरले असोज ३ लाई कालो दिनका साथै शोक दिवसको रूपमा पनि मनाइने व्यवस्था गरिएको बताए । यस दिन सबै समर्थकहरूले कालो पट्टी लगाएर स्मरण गर्नेछन् ।

असोज ३ गते संविधान दिवसको रूपमा मनाइन्छ । २०७२ साल असोज ३ मा वर्तमान संविधान जारी गरिएको थियो । तर, लोसपा नेपाल लगायत मधेशवादी दलहरूले संविधानले मधेशको अधिकार र पहिचान पूरा नगरेको भन्दै यस दिनलाई कालो दिवसको रूपमा स्मरण गर्दै आएका छन् ।

यी दलहरूले संविधान संशोधनको माग गर्दै लामो समयदेखि आन्दोलन गरेका छन् । संशोधन नभएपछि लोसपा नेपालले सुरुदेखि असोज ३ लाई कालो दिवसको रूपमा मनाउँदै आएको छ ।

बैठकले हालैको जेनजी आन्दोलनमा शहादत प्राप्त गरेका सबै शहीदप्रति श्रद्धाञ्जली अर्पण गर्ने पनि निर्णय गरेको छ । अध्यक्ष ठाकुरले भने, ‘हामीले यो दिनमा संविधान सुधारको मागसँगै आन्दोलनमा जानेकाहरूको बलिदानलाई स्मरण गर्नेछौं ।’