काठमाडौं, १ असोज । जनमत पार्टीभित्र आन्तरिक विवाद तीव्र बनेको छ । पार्टीका ६ शीर्ष नेताहरूले अध्यक्ष डा. सिके राउतलाई २४ घण्टाभित्र राजीनामा दिन अल्टिमेटम दिएपछि राउतले सामाजिक सञ्जालमार्फत पार्टी छोड्न सबैलाई जवाफ फर्काएका छन् ।

बुधबार फेसबुकमा स्ट्याटस पोस्ट गर्दै राउतले लेखेका छन्, ‘यहि सही मौका हो, जनमत पार्टी छोड्नलाई । यदि कसैलाई पार्टीमा उकुसमुकुस छ, अनुशासनमा बस्न सकिँदैन, एउटै पार्टीमा बसेर दिनरात पार्टीको विरोध गर्नुपरेको छ, भित्रभित्रै पार्टीलाई खोक्रो बनाउनु परेको छ भने योभन्दा राम्रो मौका आउनेछैन । मौकाको सदुपयोग गर्नुहोस् ।’

राउतले आफ्ना समर्थक तथा पार्टीका सदस्यहरूलाई पार्टीलाई स्वच्छ, वफादार, इमानदार र क्रियाशील सदस्यको संगठन बनाउने शुद्धीकरण अभियानमा सहयोग गर्न आग्रह गरेका छन् । उनले भनेका छन्, ‘यो अवसर सदुपयोग गरेर पार्टीलाई बलियो बनाउनु सबैको दायित्व हो ।’

यस अघि, पार्टी नेतृत्वका ६ नेताले राउतको राजीनामा माग गरेका थिए । उनीहरूमा केन्द्रीय प्रवक्ता डा. शरतसिंह यादव, जनमत युवा सङ्घका संयोजक सञ्जय यादव, स्वास्थ्यकर्मी जनमत सङ्घका संयोजक सिके सिंह, सुदूरपश्चिम प्रदेशका इन्चार्ज राजाराम चौधरी र राष्ट्रिय परिषद् सदस्य विक्रम बहादुर बम रहेका छन् ।

मागपत्रमा जनमत पार्टी जनताको अथक प्रयासबाट स्थापित भए तापनि पछिल्ला समयमा नेतृत्वको कमजोर कार्यशैली, निर्णय प्रक्रियामा पारदर्शिताको कमी र जनभावनासँग विमुख गतिविधिहरूले पार्टीको मूल उद्देश्य र कार्यकर्ताको मर्मअनुसार अघि बढ्न नसकेको उल्लेख गरिएको छ ।
https://www.facebook.com/drckraut/posts/1339934720826059?ref=embed_post