काठमाडौं, १ असोज । भदौ २३ र २४ गतेको जेनजी आन्दोलनका क्रममा स्थानीय तह र सरकारी निकायमा भएको क्षतिको विवरण संकलन सुरु भएको छ ।

संघीय मामिला तथा सामान्य प्रशासन मन्त्रालयले सबै स्थानीय तह र जिल्ला समन्वय समितिलाई गुगल लिंक पठाउँदै क्षतिको विवरण अनिवार्य रूपमा भर्न निर्देशन दिएको हो ।

मन्त्रालयले भवन, मेसिनरी उपकरण, फर्निचरदेखि सरकारी कागजातसम्मको अवस्थाबारे विस्तृत विवरण उपलब्ध गराउन भनेको छ । स्थानीय तह र जिल्ला समन्वय समितिले संकलित विवरण संघीय सरकारमा पेस गर्ने व्यवस्था मिलाइएको मन्त्रालयका एक अधिकारीले जानकारी दिए ।

जेनजी आन्दोलनका क्रममा देशभरका स्थानीय तहमा कार्यालय भवन, अभिलेख, फर्निचर र सम्पत्तिहरूमा ठूलो क्षति पुगेको प्रारम्भिक तथ्यांक आएको छ । तर, वास्तविक तथ्यांक संकलनका लागि मन्त्रालयले यस्तो प्रक्रिया सुरु गरेको हो ।

अधिकारीका अनुसार विवरण संकलनपछि सरकारबाट आवश्यक पुनर्निर्माण, मर्मत तथा क्षतिपूर्ति सम्बन्धी निर्णय हुनेछ ।