सुनसरी, १ असोज । लगातारको वर्षाका कारण सप्तकोशी नदीमा जलसतह तीव्र गतिमा बढ्न थालेपछि कोशी ब्यारेजमा सतर्कता बढाइएको छ ।

बुधबार बिहान ११ बजे गरिएको मापनअनुसार नदीमा पानीको बहाव प्रति सेकेण्ड दुई लाख सात हजार ३० क्युसेक पुगेपछि ब्यारेजका २७ ढोका खोलिएको जिल्ला प्रहरी कार्यालय सप्तरीका प्रवक्ता प्रहरी निरीक्षक योगराज खतिवडाले जानकारी दिए ।

मंगलबार राति १० बजे गरिएको मापनमा नदीमा एक लाख ८२ हजार २८७ क्युसेक पानीको बहाव देखिएपछि त्यतिबेला २४ ढोका मात्रै खोलिएको थियो । तर, रातभर वर्षा जारी रहेपछि बुधबार बिहानदेखि पानीको सतह झन् बढेको छ ।

गत भदौ १७ गते पनि कोशीमा पानीको बहाव उच्च स्तरमा पुगेको थियो । त्यतिबेला ब्यारेजका ५६ ढोकामध्ये ३८ वटा खोलेर पानीको निकास गरिएको थियो । त्यसयता केही दिन सतह घटे पनि हाल फेरि पानीको बहाव बढ्दै गएको हो ।

कोशी ब्यारेज कन्ट्रोल रुमका अनुसार नदीमा पानीको प्रवाह एक लाख ५० हजार क्युसेक नाघेपछि खतराको संकेत स्वरूप रातो बत्ती बाल्ने गरिएको छ । हाल त्यही अनुसार ब्यारेजमा रातो बत्ती प्रज्वलन गरिएको छ ।

पहाडी भेगमा भइरहेको लगातारको वर्षाले सप्तकोशीमा पानीको मात्रा बढाएको हो । स्थानीय प्रशासनले नदी किनारका बासिन्दालाई सतर्क रहन आग्रह गरेको छ ।

सुरक्षा निकायले सम्भावित जोखिमलाई ध्यानमा राख्दै नदी किनारका क्षेत्रको नियमित अनुगमन गर्ने, आवश्यक परे स्थानीयलाई सुरक्षित स्थानमा सार्ने तयारी गरेको जनाएको छ ।