जनकपुरधाम, १ असोज । प्रहरीले धनुषाको विदेह नगरपालिका–३ जोगियारास्थित इँटाभट्टाबाट ठूलो परिमाणको अवैध गाँजा बरामद गरेको छ । सोही गाँजासहित दुई जनालाई प्रहरीले नियन्त्रणमा लिएको हो ।

पक्राउ पर्नेमा धादिङको बेनीघाट–रोराङ गाउँपालिका–१ का २४ वर्षीय बिराज गुम्बा र बाँकेको कोहलपुर पार्वतीपुरका १८ वर्षीय एक किशोर रहेका छन् ।

इलाका प्रहरी कार्यालय ढल्केवरबाट खटिएको प्रहरी टोलीले गणेशमान चारनाथ नगरपालिका–४ वीरेन्द्रबजारस्थित सडकमा रोकेर प्र.३–०१–०२४ च ८३२५ नम्बरको पिकअप गाडी चेकजाँच गर्दा उनीहरूलाई नियन्त्रणमा लिएको थियो । धरानबाट गाँजा ल्याइएको भन्ने सूचनाको आधारमा प्रहरीले पछ्याउँदै गर्दा उक्त गाडी फेला पारेको जनाएको छ ।

प्रारम्भिक अनुसन्धानका क्रममा पक्राउ परेकाहरूले गाँजा विदेह नगरपालिका–३ जोगियारास्थित एक इँटाभट्टामा राखेको स्वीकार गरेका थिए । प्रहरी टोलीले त्यहाँ पुगेर १९ वटा बोरा खोलेर जाँच गर्दा करिब ४ सय ७५ किलो गाँजा बरामद गरेको हो ।

प्रहरीले बरामद गरिएको गाँजा र पक्राउ परेकालाई आवश्यक अनुसन्धान तथा कानुनी कारबाहीका लागि इलाका प्रहरी कार्यालय ढल्केवरमा राखेको जनाएको छ ।

प्रहरी स्रोतका अनुसार गाँजा उत्पादन र कारोवार नियन्त्रणका लागि पछिल्लो समय मधेश प्रदेशमा विशेष अभियान सञ्चालन भइरहेको छ ।