काठमाडौं, १ असोज । मधेश प्रदेशमा सत्तासङ्गठनमै महत्वपूर्ण भूमिका खेल्दै आएको जनमत पार्टीभित्र आन्तरिक असन्तुष्टि सतहमा आएको छ । पार्टीका शीर्ष नेताहरूले नै पार्टी अध्यक्ष डा. सिके राउत र सङ्गठन विभाग प्रमुख जयकान्त राउतलाई २४ घण्टाभित्र राजीनामा दिन माग गरेका छन् ।

पार्टीका उपाध्यक्ष अब्दुल खानाको नेतृत्वमा ६ जना नेताले बुधबार सामूहिक रूपमा हस्ताक्षर गरी अध्यक्ष राउत र सङ्गठन विभाग प्रमुख राउतलाई पदबाट हट्नुपर्ने माग अघि सारेका हुन् ।

नेताहरूले आफ्नो मागपत्रमा जनताको अथक प्रयासबाट बनेको जनमत पार्टी पछिल्ला वर्षहरूमा नेतृत्वको कमजोर कार्यशैली, निर्णय प्रक्रियामा पारदर्शिताको अभाव तथा जनभावनाविपरीत गतिविधिहरूका कारण मूल उद्देश्य, विचार र कार्यकर्ताको अपेक्षाअनुसार अघि बढ्न नसकेको आरोप लगाएका छन् ।

राजीनामा माग गर्ने नेताहरूमा पार्टीका केन्द्रीय प्रवक्ता डा. शरतसिंह भण्डारी, जनमत युवा सङ्घका संयोजक सञ्जय यादव, स्वास्थ्यकर्मी जनमत सङ्घका संयोजक सिके सिंह, सुदूरपश्चिम प्रदेशका इन्चार्ज राजाराम चौधरी र राष्ट्रिय परिषद् सदस्य विक्रम बहादुर बम रहेका छन् ।

मागपत्रमा भनिएको छ, ‘पार्टीभित्रका निर्णयहरू केही व्यक्तिहरूको सानो घेराभित्र सीमित हुँदै आएका छन् । यसले न त संगठन सुदृढीकरणमा योगदान पुर्याएको छ, न त कार्यकर्ताको उत्साहलाई जोगाउन सकिएको छ ।’

पार्टी नेतृत्वविरुद्ध खुलेर आवाज उठाउने नेताहरूको भनाइमा शीर्ष तहमा पारदर्शिता अभाव हुँदा पार्टी कमजोर हुँदै गएको छ । उनीहरूले पार्टीलाई मार्गमा फर्काउन तत्काल नेतृत्व परिवर्तन आवश्यक रहेको पनि स्पष्ट पारेका छन् ।

यस विषयमा पार्टी अध्यक्ष डा. सिके राउतको औपचारिक प्रतिक्रिया भने आइसकेको छैन । तर, पार्टी निकट स्रोतका अनुसार अध्यक्ष राउतले आफूविरुद्ध उठेका आरोपहरूलाई निराधार भन्दै निकट भविष्यमा प्रेस वक्तव्यमार्फत धारणा सार्वजनिक गर्ने तयारी गरेका छन् ।