जनकपुरधाममा मानव अधिकार आयोगद्वारा शान्ति र्याली
जनकपुरधाम, १ असोज । हालैको ‘जेनजी आन्दोलन’मा ज्यान गुमाउने सम्पूर्ण शहीदहरूको आत्माको चीर शान्तिको कामना र देशमा शान्ति–सुव्यवस्था कायम गर्नुपर्ने मागसहित बुधबार जनकपुरधाममा शान्ति र्याली निकालिएको छ ।
राष्ट्रिय मानव अधिकार आयोग मधेश प्रदेश कार्यालयको आयोजनामा भएको सो र्याली रामानन्द चोकबाट सुरु भई नगरका विभिन्न भाग परिक्रमा गर्दै जनक चोकमा आएर कोणसभामा परिणत भएको थियो । र्यालीमा मानव अधिकारकर्मी, नागरिक समाजका प्रतिनिधि, सञ्चारकर्मीलगायतको सहभागिता रहेको थियो ।
कोणसभामा वक्ताहरूले आन्दोलनमा ज्यान गुमाएका मृतकहरूलाई श्रद्धाञ्जली अर्पण गर्दै मुलुकमा शान्ति, न्याय र मानव अधिकारको सम्मान सुनिश्चित गर्न राज्य जिम्मेवार बन्नुपर्ने धारणा व्यक्त गरे । उनीहरूले हिंसा र दमनबाट समस्या समाधान नहुने उल्लेख गर्दै वार्ता, सहमति र संवैधानिक अभ्यासमार्फत समाधान खोज्न आग्रह गरे ।
राष्ट्रिय मानव अधिकार आयोग मधेश प्रदेशका प्रतिनिधिहरूले शान्तिपूर्ण आन्दोलन नागरिकको अधिकार भएको भन्दै सुरक्षाकर्मी तथा राज्य संयन्त्रले नागरिकको जीवनरक्षा र अधिकारको सम्मानलाई प्राथमिकता दिनुपर्नेमा जोड दिए ।
र्यालीमा सहभागीहरू ‘शान्ति चाहियो, हिंसा होइन’, ‘मानव अधिकारको संरक्षण गर’, ‘न्याय बिना शान्ति सम्भव छैन’ जस्ता नारा लगाउँदै अघि बढेका थिए ।
