सर्लाही, ३१ भदौ । जेनजी आन्दोलनको अव्यवस्थाको मौका उपयोग गर्दै नख्खु कारागारबाट फरार भएका एक कैदीलाई प्रहरीले सर्लाहीमा पक्राउ गरेको छ । पक्राउ पर्नेमा मलंगवा नगरपालिका–७ निवासी करिब ३० वर्षीय फिरोज मंसुर रहेका छन् ।

प्रहरीका अनुसार मंसुर कर्तव्य ज्यान मुद्दामा सजाय भोग्दै नख्खु कारागारको ‘न्यु ब्लक’मा कैद भुक्तान गरिरहेका थिए । तर, भदौ २४ गते जेनजी आन्दोलनको क्रममा उनी कारागारबाट भाग्न सफल भएका थिए ।

जिल्ला प्रहरी कार्यालय सर्लाहीले गोप्य सूचनाको आधारमा मंसुर आफ्नै घरमा लुकीबसिरहेको पत्ता लागेपछि सई शनिदेवल साहको नेतृत्वमा खटिएको टोलीले उनलाई नियन्त्रणमा लिएको हो ।

पक्राउ परेका मंसुरलाई हाल जिल्ला प्रहरी कार्यालय सर्लाहीको हिरासतमा राखिएको छ । आवश्यक प्रक्रिया पूरा भएपछि उनलाई नख्खु कारागार पठाइनेछ ।

जेनजी आन्दोलनका बीच देशभरका विभिन्न जेलबाट कैदीबन्दी फरार भएका थिए । सुरक्षा निकायले फरार कैदीबन्दीको खोजी अभियानलाई तीव्र बनाएको छ ।