सर्लाही, ३१ भदौ । सर्लाहीको हरिपुर्वा नगरपालिका–६ मा साउन ३० गते भएको गोलीकाण्डका फरार अभियुक्त सन्तोष (अभिकुमार) यादव पक्राउ परेका छन् ।

उनलाई भारतबाट नेपाल प्रवेश गर्ने क्रममा मंगलबार बिहान करिब ६ बजे नियन्त्रणमा लिइएको जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईले जानकारी दिएका छन् ।

साउन ३० गते राति करिब ८ः२० बजे ४० वर्षीय रामपुकार यादव आफ्नै घरअगाडि बसिरहेको बेला मोटरसाइकलमा आएका दुई व्यक्तिले गोली प्रहार गरेका थिए । घटनामा संलग्न व्यक्तिहरूले रामपुकारका छोरा सुमित राय यादवसँगको विवादलाई लिएर कुराकानी गर्ने क्रममा स्थिति तिक्त बनेको प्रहरीले जनाएको छ ।

उक्त घटनामा सन्तोष यादव र धर्मेन्द्र (धिरेन्द्र) राय फरार भएका थिए । गोली प्रहारका क्रममा रामपुकारको टाउकोमा गोली लागेको थियो । भाग्ने क्रममा मोटरसाइकल दुर्घटना हुँदा धर्मेन्द्र राय घाइते अवस्थामा पक्राउ परेका थिए भने सन्तोष यादव एक महिनासम्म फरार थिए ।

डीएसपी राईले भने, ‘घटनामा संलग्न फरार अभियुक्तलाई पक्राउ गरी थप अनुसन्धान अघि बढाइएको छ । हत्या प्रकरणमा संलग्न अन्य सम्भावित कारण र पृष्ठभूमि बारे अनुसन्धान जारी राखिएको छ ।’

घटनाले स्थानीयस्तरमा ठूलो त्रास फैलाएको थियो । घटनापछि पीडित परिवारले न्यायको माग गर्दै प्रहरी र प्रशासनमा दबाब बढाएका थिए । अब अभियुक्त पक्राउ भएपछि पीडित परिवारले न्याय पाउने आशा व्यक्त गरेका छन् ।