रौतहट, ३१ भदौ । रौतहटको गौर कारागारबाट भदौ २४ गते भागेका कैदीबन्दीहरूलाई प्रहरीले तत्काल आत्मसमर्पण गर्न आग्रह गरेको छ ।

जिल्ला प्रहरी कार्यालय रौतहटका प्रवक्ताले जारी गरेको विज्ञप्ति अनुसार फरार कैदीबन्दीहरू मध्ये केही प्रहरीको सम्पर्कमा आइसकेका छन् । तर, अझै ठूलो संख्याका कैदीबन्दीहरू सम्पर्कबाहिर रहेको जानकारी दिइएको छ ।

प्रवक्ताले सबै फरार कैदीबन्दीलाई अविलम्ब नजिकको प्रहरी कार्यालय वा गौर कारागार कार्यालयमा सम्पर्क राख्न अनुरोध गर्दै चेतावनी दिएका छन् । उनले भने, ‘सम्पर्कमा नआएमा कारागार ऐन २०७९ को दफा ४९ (ग) अनुसार तोकिएको सजायमा थप ५ वर्षसम्म कैद सजाय हुनेछ ।’

जिल्ला प्रहरी कार्यालयले फरार कैदीबन्दीहरूको खोजीकार्य तीव्र बनाएको र उनीहरूलाई पक्राउ गर्न विशेष टोली परिचालन गरिएको जानकारी दिएको छ ।

प्रहरीले नागरिकलाई पनि सतर्क रहन र शंकास्पद गतिविधिबारे तुरुन्त सूचना दिन आग्रह गरेको छ ।