सप्तरी, ३१ भदौ । सप्तरीको छिन्नमस्ता गाउँपालिकाका जनप्रतिनिधि र कर्मचारीहरूले जेनजी आन्दोलनका क्रममा भएको क्षतिपूर्ति र राष्ट्र पुनर्निर्माणका लागि राज्यबाट पाउने दुई दिनको तलब भत्ता योगदान गर्ने निर्णय गरेका छन् ।

गाउँपालिका अध्यक्ष विद्यानन्द चौधरीको पहलमा मंगलबार बसेको संयुक्त बैठकमा जनप्रतिनिधि तथा कर्मचारीहरूले सर्वसम्मत रूपमा यस्तो निर्णय लिएका हुन् ।

अध्यक्ष चौधरीका अनुसार गत सोमबार र मंगलबारको जेनजी आन्दोलनमा भएको अकल्पनिय क्षति पूर्ति गर्न र पुनर्निर्माणमा सहयोग पुर्याउन राज्यबाट पाउने तलब भत्तामध्ये दुई दिन बराबरको कटौती गरेर जम्मा हुने रकम कुल ५ लाख ५१ हजार रुपैयाँ राष्ट्र पुनर्निर्माण कोषमा हस्तान्तरण गर्ने निर्णय भएको हो ।

अध्यक्ष चौधरीले भने, ‘आवश्यकता अनुसार भविष्यमा पनि पालिकाको साधनस्रोतले भ्याएसम्म थप सहयोग गर्ने हाम्रो प्रतिवद्धता छ ।’

बैठकले जेनजी आन्दोलनका क्रममा शहादत प्राप्त गरेका शहीदप्रति श्रद्धाञ्जली, घाइतेहरूको शिघ्र स्वास्थ्यलाभको कामना गर्दै पारदर्शिता, सुशासन र जनतामुखी सेवा प्रवाहप्रति अटल रहि पुनर्निर्माण तथा विकास यात्रामा सक्रियतासाथ अघि बढ्ने निर्णय गरेको गाउँपालिकाले जनाएको छ ।

गाउँपालिकाले भविष्यमा पनि समान दृष्टिकोण र सहकार्यमार्फत् विकास र पुनर्निर्माणका कार्यक्रमहरूलाई प्रभावकारी बनाउन तत्पर रहने जनाएको छ ।