बारा, ३१ भदौ । बाराको सुवर्ण गाउँपालिका–३ पतगछियामा सोमबार राति तीन स्थानीयको मृत्यु भएको छ । मृत्यु हुनेमा करिब ४५ वर्षीय गोपाल यादव, ३० वर्षीय रविशंकर यादव र ४० वर्षीय अजमुल मिया रहेका छन् ।

जिल्ला प्रहरी कार्यालय बाराका प्रहरी प्रवक्ता बिजयराज पण्डितका अनुसार गोपाल यादवको गाउँकै स्थानीय अस्पतालमा उपचारको क्रममा मृत्यु भएको हो भने रविशंकर यादव र अजमुल मियाको भारतको मोतिहारीस्थित अस्पतालमा उपचारका क्रममा मृत्यु भएको हो । अहिलेसम्म मृत्युको कारण स्पष्ट हुन सकेको छैन ।

स्थानीयको भनाइ अनुसार तीनै जना भदौ २९ गते एकै ठाउँमा भेला भएर मदिरा सेवन गरेका थिए । मदिरा सेवन गरेको भोलिपल्ट उनीहरू बिरामी परेको र उपचारको लागि अस्पताल गएको जानकारी प्रहरीले पाएको छ ।

स्थानीयले गोपाल गाउँकै अस्पतालमा गएका थिए भने रविशंकर र अजमुल भारत मोतिहारीस्थित अस्पतालमा उपचारको लागि गएको जानकारी दिए । केही घण्टाको फरकमा तीनैजनाको मृत्यु भयो ।

प्रहरीले प्रारम्भिक रूपमा विषाक्त मदिरासेवनको आशंका गरेको छ । जिल्ला प्रहरी कार्यालय बाराले घटनाको अनुसन्धान गर्न विशेष टोली खटाएको छ ।