जनकपुरधाम, ३१ भदौ । जेनजी पुस्ताको आन्दोलनमा ज्यान गुमाएका शहीदहरूको बलिदान सम्झदै जनकपुरधामका साधुसन्त समाजले सरकारसमक्ष ठोस मागहरू अघि सारेका छन् ।

साधुसन्त समाजले भ्रष्टाचार नियन्त्रण, सुशासनको सुनिश्चितता, आन्दोलनका क्रममा सम्पदा नष्ट गर्नेहरूलाई कारवाही र संघीय लोकतान्त्रिक व्यवस्थाभित्र सनातन हिन्दू राष्ट्र कायम गर्नुपर्ने माग गरेका छन् ।

मंगलबार सनातन हिन्दू समाज नेपालद्वारा आयोजना गरिएको र्यालीमा साधुसन्त समाजका अगुवाहरूले आन्दोलनमा ज्यान गुमाएका युवाहरूको बलिदान व्यर्थ नजानुपर्ने जोड दिएका छन् ।

उनीहरूले भने, ‘देश र समाज सुधारको आशामा ज्यान आहुति दिएका युवापुस्ता हाम्रो लागि प्रेरणाको स्रोत हुन् । राज्यले तिनको बलिदानलाई न्याय दिनुपर्छ ।’

साधुसन्तहरूले आन्दोलनको क्रममा सार्वजनिक सम्पदा, धार्मिक स्थल र ऐतिहासिक संरचनामा भएको क्षतिलाई गम्भीर अपराधको रुपमा व्याख्या गर्दै दोषीको पहिचान गरी कडा कारवाहीको माग गरेका छन् । जानकी मन्दिरका सहायक महन्थ रामरोशन दासले भने, ‘सम्पदा हाम्रो संस्कृति र अस्मिताको परिचायक हुन् । तिनलाई नष्ट गर्नेहरूमाथि कडाभन्दा कडा कदम चाल्नुपर्छ ।’

त्यसैगरी, साधुसन्त समाजले वर्तमान व्यवस्थामा सुशासनको गम्भीर कमी रहेको भन्दै भ्रष्ट्राचार नियन्त्रणलाई राष्ट्रिय अभियानको रूपमा अघि बढाउन सरकारलाई चेतावनी दिएका छन् । उनीहरूको तर्क अनुसार भ्रष्टाचार निर्मूल नभएसम्म जनताको आस्था राज्यतर्फ फर्किन सक्दैन ।

साधुसन्तहरूले संघीय लोकतान्त्रिक व्यवस्थाभित्र सनातन हिन्दू राष्ट्र कायम गर्नुपर्नेमा जोड दिएका छन् । उनीहरूले नेपालको मौलिकता, परम्परा र सामाजिक समरसताको आधार सनातन संस्कार भएको भन्दै संविधानमै त्यसलाई प्रत्याभूत गर्नुपर्ने तर्क गरेका छन् ।