जनकपुरधाम, ३१ भदौ । मधेश प्रदेशको राजनीति फेरि अस्थिर मोडतर्फ धकेलिएको छ । जनमत पार्टीले प्रदेश सरकारलाई दिएको समर्थन मंगलबार फिर्ता लिएपछि नयाँ सत्ता समीकरणको चर्चा शुरु भएको हो ।

जनमत संसदीय दलका नेता महेशप्रसाद यादवले समर्थन फिर्ता सम्बन्धी पत्र सभामुख रामचन्द्र मण्डललाई बुझाएका छन् । उक्त पत्र अब प्रदेश सभा सचिवालयमा दर्ता भइसकेको छ । पार्टीले यससँगै आफ्ना मुख्यमन्त्री र मन्त्रीहरूलाई पनि फिर्ता बोलाएको छ ।

यादवका अनुसार हालको राजनीतिक परिस्थितिले पार्टीलाई सरकारबाट बाहिरिन बाध्य बनाएको हो । यसअघि जनमत पार्टीले प्रदेश प्रमुख सुमित्रा सुवेदी भण्डारीलाई विद्युतीय माध्यममार्फत समर्थन फिर्ता र मन्त्रीहरूको फिर्ता बोलाएको जानकारी गराइसकेको थियो ।

स्रोतका अनुसार जेनजी आन्दोलनकै क्रममा देखिएको आन्तरिक विवादले पार्टीलाई यस्तो कदम चाल्न प्रेरित गरेको हो । मुख्यमन्त्री सतिश कुमार सिंहले पार्टी निर्देशन अनुसार राजीनामा दिएको भन्दै सामाजिक सञ्जालमा पोस्ट गरेपछि पार्टीभित्र आन्तरिक असहमति चुलिएको थियो । तर, पछि उनले राजीनामा नदिने घोषणा गरेपछि पार्टी नेतृत्व आक्रोशित बनेको थियो । यही विवादको परिणामस्वरूप जनमत पार्टीले सरकारबाट समर्थन फिर्ता गर्ने निर्णय लिएको जनाइएको छ ।

जनमत पार्टीबाट सरकारमा मुख्यमन्त्रीमा सतिश कुमार सिंह, वन तथा वातावरण मन्त्रीमा संजय यादव र उद्योग, वाणिज्य तथा पर्यटन मन्त्रीमा बसन्त कुशवाहा सहभागी थिए । उनीहरूको पदसमेत अब स्वतः समाप्त भएको छ ।

यस कदमसँगै मधेश प्रदेशमा सरकारको बहुमत गुमेको छ । अब प्रदेश प्रमुखले नयाँ सरकार गठनका लागि आह्वान गर्नुपर्ने स्थिति आएको छ । ठूला दलहरू नेतृत्वको लागि आन्तरिक तयारी गरिरहेका छन् । तथापि केन्द्रीय नेताहरूले यस विषयमा धारणा सार्वजनिक नगरेको र कानुन प्रक्रिया सुरु नभएको हुनाले नेतृत्वको लागि इच्छुक पार्टीका नेताहरू खुलेर बोलिरहेका छैनन् ।