जनकपुरधाम, ३१ भदौ । मधेश प्रदेश सरकारमा जनमत पार्टीबाट सहभागी दुई मन्त्रीले एकसाथ पदबाट राजीनामा दिएका छन् ।

वन तथा वातावरण मन्त्री संजय कुमार यादव र उद्योग, वाणिज्य तथा पर्यटन मन्त्री बसन्त कुशवाहाले सामाजिक र राजनीतिक परिस्थितिलाई ध्यानमा राख्दै पदबाट हटेको जानकारी सार्वजनिक गरेका हुन् ।

राजीनामा पत्रमार्फत् मन्त्री यादवले वर्तमान राजनीतिक परिस्थितिले देशलाई अस्थिर बनाइरहेकोले नयाँ जेनजी पुस्ताका युवाहरूको आन्दोलन, उनीहरूको माग र भावनालाई आत्मसात् गर्दै संघीय लोकतान्त्रिक गणतन्त्रको रक्षा र संघीयतालाई सुदृढ बनाउन निरन्तर संघर्ष र बलिदानका लागि तत्पर रहने प्रतिबद्धता व्यक्त गरेका छन् ।

यादवले भने, ‘म सधैं जनताको सेवामा प्रतिबद्ध रहने छु । यही दृष्टिकोणका आधारमा मैले वन तथा वातावरण मन्त्रालयको मन्त्री पदबाट राजीनामा दिएको जानकारी गराउँछु ।’

त्यसैगरी, उद्योग, वाणिज्य तथा पर्यटन मन्त्री बसन्त कुशवाहाले पनि आफ्नो राजीनामा पत्रमा अग्रगामी राजनीतिक निकास र जेनजी पुस्ताका युवाहरूको आवाजलाई सम्मान गर्दै पदबाट हटेको बताएका छन् ।

कुशवाहाले राजीनामामा भनेका छन्, ‘मधेश प्रदेशको स्थिरता, संघीय लोकतन्त्रको संरक्षण र युवाहरूको मागको सम्मानका लागि यो निर्णय आवश्यक भएको हो ।’