रौतहट, ३० भदौ । जेनजी आन्दोलनका कारण भदौ २४ गतेदेखि अवरुद्ध बनेको गौर नगरपालिकाको सेवा सोमबारदेखि पुनः नियमित रूपमा सञ्चालनमा आएको छ । नगरप्रमुख शम्भु साहले नगरपालिकाका सबै वडा कार्यालयसहित प्रमुख कार्यालयमा स्थगित सेवाहरू पुनः सुरु गर्न निर्देशन दिएका छन् ।

नगरपालिकाका प्रमुख प्रशासकीय अधिकृत सुभाषकुमार ठाकुरका अनुसार सङ्घीय मामिला तथा सामान्य प्रशासन मन्त्रालय र जिल्ला प्रशासन कार्यालय रौतहटको आग्रहपछि सेवाप्रवाह पुनः सुचारु गरिएको हो । सोमबारदेखि आवश्यक कागजी प्रक्रिया र सार्वजनिक सेवाहरू नागरिकलाई उपलब्ध गराउन कर्मचारी परिचालन गरिएको छ ।

तर, आन्दोलनले गौर नगरपालिकामा ठूलो भौतिक तथा वित्तीय क्षति पुर्याएको छ । नगरप्रमुख साहका अनुसार आन्दोलनकारीहरूले कार्यालयमा तोडफोड र आगजनी गर्दा करिब ६७ लाख रुपैयाँ बराबरको क्षति भएको छ । उनीहरूले फर्निचर, एलइडी टिभी, स्मार्ट टिभी, साउण्ड सिस्टम, सिसीटिभी लगायतका उपकरण जलाएको साथै पिकअप भ्यान र वारुण यन्त्रमा समेत क्षति पुर्याएका थिए ।

यस्तै, कार्यालयको झ्यालका सिसा फुटाइएको थियो भने नगरपालिकाद्वारा निर्माण गरिएको प्रहरी बिट र गौर घण्टाघरमा राखिएको बीपी कोइरालाको शालिकसमेत तोडफोड गरी जलाइएको थियो । नगरप्रमुख साहले आन्दोलनकारीहरूले आर्थिक वर्ष २०८१/८२ को अन्तिम लेखा परीक्षणका लागि राखिएका धेरैजसो कागजात पनि जलेको जानकारी दिए ।

महालेखा परीक्षकको कार्यालयबाट खटिएको टोलीले गौर नगरपालिकामा लेखापरीक्षण सुरु गरेको भए पनि आन्दोलनका कारण काम सम्पन्न हुन सकेको थिएन । गौर नगरपालिकाले सेवा सुचारु भएको वेला सुरक्षाको व्यवस्था कडा बनाएको जनाएको छ ।