जनकपुरधाम, ३० भदौ । जनमत पार्टीले आफ्ना केन्द्रीय सचिव विशेश्वर प्रसाद (बीपी) साहलाई निलम्बन गरेको छ ।

पार्टीको निर्णयअनुसार उनी अनुसन्धान पूरा नभएसम्म सचिव पदसहित साधारण सदस्यबाट पनि निलम्बित रहिनेछन् ।

केन्द्रीय अनुशासन समितिका संयोजक इन्जिनियर नरेन्द्र प्रसाद चौधरीका अनुसार सोमबार जारी पत्रमा २०८१ चैत्र ३१ गते साहविरुद्ध जबरजस्ती करणी सम्बन्धी मुद्दा दर्ता भएको र गत भदौ ५ गते जिल्ला प्रहरी कार्यालय धनुषाले त्यस सम्बन्धमा सूचना जारी गरेको उल्लेख गरिएको छ ।

समितिले उक्त घटनाप्रति गम्भीर ध्यानाकर्षण भएको जनाउँदै साहलाई सात दिनभित्र स्पष्टीकरण पेश गर्न आग्रह गरेको छ । पार्टीले यस कदममार्फत आन्तरिक अनुशासन कायम राख्ने र संवेदनशील मुद्दामा सजग रहन आवश्यक ठानेको बताइएको छ ।