रौतहट, ३० भदौ । जेनजी आन्दोलनपछि नागरिकलाई सहज र प्रभावकारी सेवा प्रवाह सुनिश्चित गर्न रौतहट जिल्लाको जिल्ला प्रशासन कार्यालयले १० बुँदे निर्देशन जारी गरेको छ ।

जिल्ला प्रशासनको आयोजनामा बसेको कार्यालय प्रमुखहरूको बैठकको निर्णयअनुसार सार्वजनिक गरिएको निर्देशनले आन्दोलनका क्रममा कार्यालयमा भएका तोडफोड र आगलागीबाट भएको क्षतिको व्यवस्थापन र भविष्यमा कार्यालयीय कामकाज व्यवस्थित बनाउन जोड दिइएको छ ।

निर्देशनअनुसार सम्बन्धित कार्यालयहरूले तोडफोड तथा आगलागीबाट भएको अनुमानित क्षतिको विवरण प्रमाणसहित प्रशासनमा बुझाउनुपर्नेछ । साथै, कार्यालय परिसर, आफ्नै भवन र कर्मचारीहरूको सुरक्षामा विशेष ध्यान दिन तथा स्थानीय समुदायसँग सहकार्य गर्न भनिएको छ ।

जिल्ला प्रशासनले सो निर्देशनमार्फत भविष्यमा यस्ता घटनाबाट हुने क्षति न्यूनिकरण गर्न र सेवा प्रवाहमा रोकावट नआओस् भन्ने उद्देश्य राखेको जनाएको छ ।