जनकपुरधाम, ३० भदौ । जेनजी आन्दोलनका क्रममा जनकपुरधामबाट सुरक्षाकर्मीको हतियार लुट्ने कार्यमा संलग्न दुई जनालाई प्रहरीले पक्राउ गरेको छ ।

जिल्ला प्रहरी कार्यालय धनुषाका अनुसार भदौ २४ गते बेलुकी करिब ७ बजे मधेश प्रदेश लोक सेवा आयोगको कार्यालयमा आन्दोलनकारी प्रवेश गरी तोडफोड र आगजनी गरेका थिए । सो क्रममा सुरक्षामा खटिएका प्रहरीबाट एसएलआर राइफल एक थान र ५० राउन्ड गोली लुटिएको थियो ।

घटनापछि प्रहरीको अनुसन्धान टोलीले सीसीटीभी फुटेज विश्लेषण गर्दै जनकपुरधाम उपमहानगरपालिका–९ का ३७ वर्षीय मनिषकुमार अधिकारी र २१ वर्षीय सन्तोषकुमार यादवलाई पक्राउ गरेको हो ।

प्रहरीले पक्राउ परेकाको साथबाट लुटिएको एसएलआर राइफल फेला पारेको जनाएको छ ।

जिल्ला प्रहरी कार्यालय धनुषाले थप अनुसन्धान अघि बढाइरहेको र पक्राउ परेकालाई आवश्यक कानुनी प्रक्रिया पूरा गरी कारबाही अघि बढाइने जानकारी दिएको छ ।