जनकपुरधाम, ३० भदौ । मिथिला क्षेत्र, तराई मधेशका जिल्लाहरू र काठमाडौंलगायतका शहरमा बसोबास गर्ने मैथिल समुदायले सोमबार जितिया पर्व अन्तर्गतको निराहार व्रत विधिपूर्वक सम्पन्न गरेको छ ।

महिलाहरूले आफ्ना सन्तानको दीर्घायु, सुस्वास्थ्य र समृद्धिको कामनासहित तीन दिनसम्म चल्ने व्रतमा सहभागी भई पूजाआर्चना गरेका थिए ।

यो वर्षको जितिया पर्व शनिवार राति ‘ओगटन’ (दर) खाएर व्रतको शुरुवात गरिएको थियो । व्रतको दोस्रो दिन महिलाहरूले धर्मवीर पुत्र जितुवाहनको कथावाचन तथा पूजा–अर्चना गरी सन्तानको दीर्घायुको कामना गरे । व्रतको अन्तिम दिन विधिपूर्वक फलाहार वा अन्नग्रहण गरी निराहार उपवास समापन गरिएको छ ।

जितिया व्रत मैथिल समाजमा कठोर उपवासको रूपमा परिचित छ । महिलाहरू मातृभाव र समर्पणको प्रतीक स्वरूप एक दिन–एक रात पानी र खाना नखाई व्रत बस्छन् । धार्मिक विश्वासअनुसार यस व्रतले सन्तानको आयु लम्ब्याउने, स्वास्थ्य राम्रो राख्ने र सङ्कटबाट जोगाउने प्रभाव पर्ने विश्वास गरिएको छ ।

मिथिला समाजमा यहि पर्वले मात्र धार्मिक महत्व नभई सांस्कृतिक पहिचानलाई समेत बल पुर्याउने मानिन्छ । यस अवसरमा महिलाहरूले परम्परागत पोशाकमा सजिएर पूजाआर्चना सम्पन्न गरेको र स्थानीय समुदायमा पर्वको उल्लास फैलिएको थियो ।