जनकपुरधाम, ३० भदौ । जेनजी आन्दोलनपछि बन्द भएका धनुषाका सरकारी कार्यालयहरू सोमबारदेखि क्रमशः सेवा प्रवाहमा फर्किएका छन् ।

सेवाग्राहीहरू पनि कार्यालयमा उपस्थित हुन थालेका छन् भने यहाँका बैंक तथा वित्तीय संस्थाहरू समेत सञ्चालनमा आएका छन् ।

जिल्ला प्रशासन कार्यालय धनुषाले सरकारी कार्यालयहरूलाई नियमित सेवा प्रवाह गर्न लिखित सूचना जारी गरेपछि कार्यालयहरू सरसफाइ गरी खुल्न थालेका हुन् । तर, कतिपय कार्यालय पूर्ण रूपमा जलेर नष्ट भएका कारण अझै सञ्चालनमा आउन सकेका छैनन् ।

जनकपुरधाम उपमहानगरपालिका पूर्ण रूपमा क्षतिग्रस्त भएकाले सेवा दिन वातावरण नभएको नगरप्रमुख मजोज साहले जानकारी दिए । उनका अनुसार कम्प्युटर, इन्टरनेट, ल्यापटप, दराज, महत्त्वपूर्ण कागजात, फाइल रेकर्ड, सिसा, कुर्सी, टेबल, झ्यालढोका लगायतको क्षति भएको छ ।

जिल्ला प्रशासन कार्यालयले क्षतिको विवरण सङ्कलन गरी प्रमाणित गरी अभिलेख कायम गर्न अनुरोध गरेको छ । सो अनुरूप क्षतिको विवरण सङ्कलन र प्रहरीबाट मुचुल्का उठाउने कार्य भइरहेको छ ।

हालसम्म राहदानी तथा राष्ट्रिय परिचयपत्रसम्बन्धी सेवा सञ्चालनमा आउन सकेको छैन । जिल्ला प्रशासनका सहायक प्रमुख जिल्ला अधिकारी उमेशकुमार दाहालद्वारा जारी सूचनामा सार्वजनिक स्थल तथा कार्यालयहरूमा अप्रिय घटना वा उच्छृङ्खल गतिविधि नहोस् भनेर सुरक्षा व्यवस्था कडा गरिएको उल्लेख छ ।

जेन्जी आन्दोलनका क्रममा धनुषामा करिब दुई दर्जनभन्दा बढी सरकारी कार्यालय, सार्वजनिक कार्यालय र राजनीतिक दलका कार्यालयहरूमा आगजनी तथा तोडफोड भएको थियो । नेपाली सेनासहित नेपाल प्रहरी र सशस्त्र प्रहरीको टोली बजार तथा संवेदनशील स्थानहरूमा सुरक्षा खटिएका छन् ।

सार्वजनिक सेवाको क्रमिक सुचारु भएपछि जनजीवन सामान्यतर्फ फर्किन थालेको छ । तर, क्षति परेका कार्यालय र हराएका कागजातहरूको पुनःस्थापना लामो समय लाग्ने अनुमान गरिएको छ ।