सिरहा, ३० भदौ । जेनजी आन्दोलनका क्रममा सिरहाको लहान नगरपालिका–१ स्थित खाद्य व्यवस्था तथा व्यापार कम्पनीको गोदामबाट लुटपाट गरिएको खाद्यान्न क्रमशः फिर्ता हुन थालेको छ । प्रशासनले कडा निर्देशन जारी गरेपछि लुटिएका सामग्री फर्किन थालेका हुन् ।

गत मङ्गलबार दिउँसो आन्दोलनकारी समूहले कम्पनीको गोदामबाट चामल, चिनी, धान, जुटका बोरा लगायतका खाद्य सामग्री लुटपाट गरेका थिए । इलाका प्रशासन कार्यालय लहानका प्रशासकीय अधिकृत सन्तोष रायले भने, ‘लुटपाटले राष्ट्रियस्तरमै लहानको बेइज्जत भएको छ । फिर्ता नगर्नेहरूलाई सिसिटिभी फुटेज र सामाजिक सञ्जालमा उपलब्ध भिडियोका आधारमा कारबाही गरिने चेतावनी दिएकै कारण सामग्री फिर्ता हुन थालेका हुन् ।’

रायका अनुसार स्थानीय युवाहरूको सक्रियता र केही व्यक्तिहरूको स्वेच्छाले आइतबारदेखि चामल–चिनी फिर्ता भएको हो । आइतबार बेलुकी ९ बजेसम्म ७१ क्वीन्टल चामल र करिब १८ क्वीन्टल चिनी कम्पनीमा बुझाइएको खाद्य कम्पनी लहान शाखाका सूचना अधिकारी अनिलकुमार महतोले जानकारी दिए ।

उनका अनुसार फिर्ता गर्नेको प्रतिष्ठा जोगाउन नाम गोप्य राखिएको छ । लुटपाटमा चारवटा गोदाममा भण्डारण गरिएको करिब ८ हजार १४८ क्वीन्टल चामल, ३ हजार २२० क्वीन्टल चिनी, ५३ क्वीन्टल २१ किलो धान र ९८ हजार ८१५ थान जुटका बोरा हराएका थिए । यसको अनुमानित मूल्य १० करोड ९१ लाख २२ हजार रुपैयाँभन्दा बढी हुने कम्पनीको दाबी छ ।

लुटपाटका क्रममा खाद्यान्नसँगै ‘फ्युमिगेसन सिट’ समेत उठाइएका थिए । महतोका अनुसार ती सिटहरू निकै भारी हुने भएकाले कम्तीमा १० जनाको सहयोगमा मात्रै सार्न सकिन्छ । यस्तो सामग्री खाद्य कम्पनीबाहेक अन्यत्र पाइँदैन ।

त्यसैगरी, आन्दोलनकारीले कार्यालय परिसरमा पार्किङ गरिएको कार र मोटरसाइकलमा आगजनी गरेका थिए । खाद्यकर्मीको क्वार्टरमा प्रवेश गरी ल्यापटप, ग्यास सिलिण्डर, मोबाइलसमेत लुटिएको जनाइएको छ ।

लहानस्थित खाद्य कम्पनी यसअघि पनि तीन पटक आन्दोलनका क्रममा लुटपाटको शिकार भएको थियो । विसं २०६३ को मधेश आन्दोलनदेखि अन्य विभिन्न आन्दोलनसम्म पटक–पटक यसै संस्थामा आक्रमण दोहोरिँदै आएको छ । स्थानीयवासीका अनुसार यसपटक पनि ठुलो मात्रामा लुटपाट भएपछि भविष्यमा सामान्य विरोध प्रदर्शनकै समयमा पुनः जोखिम दोहोरिने खतरा अझै उच्च छ ।