जनकपुरधाम, २९ भदौ । धनुषा प्रहरीले जेलबाट फरार चार जना विदेशी कैदीबन्दीलाई नेपाल–भारत सीमा क्षेत्रमा नियन्त्रणमा लिएको छ । पक्राउ पर्नेहरूमा तीन जना नाइजेरियन र एक जना ब्राजिलका नागरिक छन् ।

प्रहरी प्रवक्ता डीएसपी बरुणबहादुर सिंहका अनुसार नाइजेरियन नागरिकहरू ३८ वर्षीय मो. लामिन्स डाबो, ३५ वर्षीय ग्लोरी बडे र ५५ वर्षीय इमनिउल ओगुडा उजिगवे हुन् । त्यस्तै, ब्राजिलका २५ वर्षीय लारेसन ब्रिटो पक्राउ परेका छन् ।

स्रोतका अनुसार यी विदेशी कैदीबन्दीहरू जेनजी आन्दोलन चर्केको समयमा २४ भदौमा नख्खु कारागारबाट फरार भएका थिए । उनीहरू लागुऔषधको मुद्दा र भिसा अवधि समाप्त भएको आरोपमा जेलमा राखिएका थिए ।

पक्राउ परेका विदेशी कैदीबन्दीहरूलाई भारतको बिहार राज्य बासोपट्टी क्षेत्रबाट पक्राउ गरेर धनुषा प्रहरीले नेपाल ल्याएको जनाएको छ ।

धनुषा प्रहरीले फरार कैदीबन्दी नियन्त्रणमा लिएपछि थप अनुसन्धान अगाडि बढाएको छ ।