जनकपुरधाम, २९ भदौ । धनुषा प्रहरीले गत भदौ २३ र २४ गते जेनजी पुस्ताको प्रदर्शनको क्रममा भएको आगजनी, तोडफोड र लुटपाटमा संलग्न ६ जनालाई पक्राउ गरेको छ । जिल्ला प्रहरी कार्यालय धनुषाका प्रहरी प्रमुख प्रहरी उपरीक्षक नरहरि रेग्मीले आइतबार यसबारे जानकारी दिएका हुन् ।

एसपी रेग्मीका अनुसार पहिलो घटनामा संलग्नहरूमा शहीदनगर नगरपालिका–३ का शिवम साह र जनकपुरधाम उपमहानगरपालिका–१३ का काले पटेल रहेका छन् । उनीहरूले प्रदेश लोक सेवा आयोगको कार्यालयमा गेट र सीसीटिभी तोडफोड गरेका थिए र गाडीमा आगजनीसमेत गरेका थिए । त्यहाँबाट प्रहरीले प्रयोग गर्ने केही हतियार पनि लुटेर फरार भएका थिए ।

यस्तै, जनकपुरधाम–८ स्थित बलवा प्रहरी चौकीमा तोडफोड र आगजनीमा संलग्न निरोज मिश्र र कृष्ण यादव पक्राउ परेका छन् । मधेश प्रदेशका विभिन्न मन्त्रालयभित्र तोडफोड, आगजनी र लुटपाट गरी कम्प्युटर, प्रिन्टर लगायतका सामग्री चोरीमा संलग्न चन्दनकुमार साह र गौतम भगत पनि पक्राउ परेका छन् । उनीहरूको साथबाट दुई थान कम्प्युटर र एक थान प्रिन्टर बरामद गरिएको प्रहरीले जनाएको छ ।

पक्राउ परेकाहरू सबैलाई सार्वजनिक अपराध र सरकारी सम्पत्तिमा क्षति पुर्याएको आरोपमा अनुसन्धान अघि बढाइएको छ । एसपी रेग्मीका अनुसार थप संलग्न व्यक्तिहरूको खोजी कार्य जारी छ ।

साथै, धनुषा प्रहरीले सिन्धुली र महोत्तरीको जलेश्वर कारागारबाट फरार भएका १० जना नेपाली बन्दीहरूलाई पनि नियन्त्रणमा लिएको छ । पक्राउ पर्ने कैदीहरू कर्तव्य ज्यान, जबरजस्ती करणी, ज्यान उद्योग तथा लागु औषध सम्बन्धी अपराधमा संलग्न रहेको पुष्टि भएको छ ।

प्रहरी नायव उपरीक्षक बरुण बहादुर सिंहले २६ गतेदेखि आइतबारसम्ममा फरार कैदीहरू पक्राउ गरिएको जानकारी दिएका छन् ।