जनकपुरधाम, २९ भदौ । जेनजी पुस्ताको आन्दोलनले केही दिन बन्द रहेको रेल्वे र बस सेवा आजदेखि पुनः सुचारु भएको छ । आन्दोलनपछि उत्पन्न अस्थिर परिस्थितिले जनजीवन प्रभावित भएको थियो । तर, अहिले स्थिति सामान्य हुँदै गएको बताइएको छ ।

नेपाल रेल्वेका सहायक केवलबहादुर नेपालीका अनुसार भारतमा सर्भिसिङ गरेर ल्याइएको रेल आइतबार बिहान ११ बजे जयनगरबाट जनकपुरधाम आइ सेवा सञ्चालनमा आएको छ । उनले बताए अनुसार आजदेखि तीन वटा समयतालिका अनुसार रेल सेवा नियमित रूपमा उपलब्ध हुनेछ ।

त्यस्तै, आन्दोलनका कारण केही दिन रोकिएको बस सेवा पनि पुनः सुरु भएको छ । माँ जानकी यातायात व्यवसायी संघका अध्यक्ष मनोज चौधरीले यात्रुहरूको सुविधा सहज भएको बताए । उनले भने, ‘सुरक्षाका कारण आन्दोलनका दिनहरूमा बस सेवा रोकिएको थियो । अब अवस्था सामान्य बनेपछि सेवा पुनः सुरु गरेका हौँ ।’

शैक्षिक क्षेत्रमा पनि स्थिति सामान्य हुँदै गएको छ । आन्दोलनकै कारण बन्द रहेका विद्यालयहरू सोमबारदेखि पुनः सञ्चालन हुने भएका छन् । एनप्याब्सन जनकपुरधामका नगर अध्यक्ष दीपक ठाकुरका अनुसार लामो समय विद्यालय बन्द हुँदा विद्यार्थीहरूको पढाइमा प्रभाव परेको थियो । उनले भने, ‘सोमबारदेखि पठनपाठन सुरु गर्न लागिएको हो । यसबारे प्रमुख जिल्ला अधिकारी शंकरहरि आचार्यलाई आज औपचारिक जानकारी दिइएको छ ।’

यससँगै आन्दोलनले प्रभावित गरेको यातायात, प्रशासनिक र शैक्षिक सेवा क्रमशः सामान्य अवस्थामा फर्किने देखिएको छ । सेवाहरू सुचारु हुनुले नागरिक जीवनमा सहजता र समुदायमा स्थिरता फर्काउन महत्वपूर्ण भूमिका खेल्नेछ ।