जनकपुरधाम, २९ भदौ । जेनजी आन्दोलनका क्रममा पूर्ण रूपमा क्षतिग्रस्त भएको जनकपुरधाम उपमहानगरपालिकाको कार्यालय कम्तीमा एक महिना भित्र मात्रै सञ्चालनमा आउन सक्ने भएको छ । मंगलबारको हिंसात्मक प्रदर्शनका क्रममा पाँच तले भवन र उपमहानगरका अधिकांश शाखा ध्वस्त भएका हुन् ।

उपमहानगरपालिका कर शाखाका प्रमुख तथा प्रवक्ता परमेश झाले जानकारी दिए अनुसार आगलागीमा कागजातदेखि विद्युतीय सामग्रीसम्म नष्ट भएको छ । कार्यालयमा वितरणका लागि राखिएका करिब २०० ग्यास सिलिण्डरमध्ये ७८ वटा विस्फोट हुँदा भवनको पछाडिको भाग पूर्णरूपमा क्षतिग्रस्त भएको छ । उनका अनुसार उपमहानगर प्रमुखको कार्यकक्ष, अभिलेख शाखा र लेखा शाखाबाहेक अन्य सबै शाखा जलेर नष्ट भएका छन् ।

झाले थपे, ‘तत्काल कम्प्युटर, प्रिन्टरलगायत आवश्यक सामग्री पुनः खरिद गर्नुपर्ने अवस्था छ । सरसफाइदेखि खरिदसम्मका कामलाई छिटो सुरुवात गरे पनि कम्तीमा एक महिना समय लाग्छ ।’

आगलागीमा कार्यालय परिसरमा रहेका एक एम्बुलेन्स, दुई वटा गाडी र करिब आधा दर्जन मोटरसाइकल पनि जलेर नष्ट भएका छन् । उपमहानगर प्रमुख मनोज साहका अनुसार कार्यालयको करिब ९५ प्रतिशत भवन र सम्पत्ति खरानी बनेको छ । साहले भने, ‘जनकपुरधाम उपमहानगरपालिकाको भवन जलेको छ । ती भवनमा अब तत्काल कार्यालय सञ्चालन गर्न सक्ने अवस्था छैन । जलेका कागजात, फर्निचर, कुर्सी–टेबल, कम्प्युटर, प्रिन्टर, हार्डड्राइभ लगायत सबै सामग्री व्यवस्थापन गरेर कार्यालयलाई पुरानै अवस्थामा फर्काउन अझै लामो समय लाग्नेछ ।’

प्रदर्शनकारीहरूले कार्यालयभित्र रहेका सवारीसाधनमा समेत आगजनी गरेका थिए । नष्ट भएका कागजात र सामग्रीले प्रशासनिक काममा ठुलो अवरोध उत्पन्न भएको छ । उपमहानगरपालिकाले चोरी भएका सामग्री फिर्ता ल्याउने अभियान सुरु गरेको छ । नगर प्रहरी र सम्बन्धित अधिकारीहरूले लुटिएको सामान स्वेच्छाले फिर्ता गर्नेहरूलाई कानुनी राहत दिने चेतावनी दिएका छन् भने नफिर्ता गर्ने वा अवैध रूपमा राख्नेहरूलाई कारबाही गर्ने तयारी गरिएको छ ।

यसैबीच, नेकपा एमालेका नेता शिवशंकर साह ‘हिरा’ ले व्यक्तिगत रूपमा १ लाख ५१ हजार रुपैयाँ सहयोग गर्ने घोषणा गर्दै उपमहानगरपालिकाको पुनर्निर्माणमा सबैलाई हातेमालो गर्न अपील गरेका छन् ।