काठमाडौं, २९ भदौ । गत मंगलबारको प्रदर्शन हिंसात्मक मोड लिँदै बालुवाटारस्थित प्रधानमन्त्री निवाससमेत आक्रमणमा परेको छ । प्रदर्शनकारीहरूले मुख्य गेट हुँदै निवास परिसरभित्र प्रवेश गरी सवारीसाधनमा आगजनी तथा भवनमा तोडफोड गरेका छन् ।

सुरक्षा स्रोतका अनुसार बालुवाटार सडकबाट प्रधानमन्त्री निवास छिर्ने ३ नम्बर मूलगेट तोडफोड गरिएको छ । सो गेटबाट प्रवेश गरेका प्रदर्शनकारीहरूले सुरक्षाकर्मीका सवारीसाधन जलाएका छन् भने केही भवनमा समेत क्षति पुगेको छ । निवासभित्र रहेका भवनका सिसा फुटेका छन् । सुरक्षाकर्मी बस्ने ब्यारेकहरूमा पनि क्षति भएको छ ।

बालुवाटारको सुरक्षा तीन तहमा विभाजित छ । बाहिरी घेरामा नेपाल प्रहरी, बीचमा सशस्त्र प्रहरी र भित्री तहमा नेपाली सेनाले सुरक्षा दिँदै आएका छन् । तर, मंगलबारको आक्रमणले बाहिरी सुरक्षा घेरा तोडेर प्रदर्शनकारीलाई प्रवेश गर्न सफल बनाएको छ । यद्यपि केही वर्षअघि मात्र बनेको सुविधासम्पन्न मुख्य आवासीय भवन र यसको आन्तरिक संरचना सुरक्षित रहेको सुरक्षास्रोतले जनाएको छ ।

प्रधानमन्त्री सुशीला कार्कीले शुक्रबार राति शपथ ग्रहण गरेपछि सरकारी निवास बालुवाटारमै बस्दै आएकी छन् । उनले व्यक्तिगत इच्छा अनुसार टोखास्थित निजी निवासमा बस्न चाहेको भए पनि त्यहाँ सुरक्षाकर्मी र सचिवालयका कर्मचारीलाई अटाउन सक्ने अवस्था नभएकाले तत्काल बालुवाटारमा सरेकी हुन् ।

शनिबार दिनभर उनले बालुवाटारस्थित सरकारी निवासमै बसेर सरकारी अधिकारी, सुरक्षाकर्मी र सरोकारवालासँग भेटघाट तथा परामर्श गरेकी थिइन् । सिंहदरबारस्थित प्रधानमन्त्री तथा मन्त्रिपरिषद्को कार्यालयमा औपचारिक पदभार ग्रहण गर्नुअघि नै प्रधानमन्त्री निवास आक्रमणमा परेको घटनाले सरकार र सुरक्षा संयन्त्रलाई ठूलो चुनौती खडा गरेको छ ।

विशेषज्ञहरूले यस घटनालाई राज्यका प्रमुख संरचनामाथिको गम्भीर आक्रमणका रूपमा लिएको टिप्पणी गरेका छन् । उनीहरूको भनाइमा
प्रधानमन्त्रीको निवाससम्म आक्रमण पुग्नु भनेको सुरक्षा संयन्त्रको कमजोरी मात्र नभई राजनीतिक असन्तोष चरम बिन्दुमा पुगेको सङ्केत हो ।

सरकारले आक्रमणबारे विस्तृत छानबिन गर्ने तयारी गरेको बताइएको छ । प्रारम्भिक क्षतिको सूची तयार पार्ने र दोषी पहिचान गरी कानुनी कारबाही गर्ने प्रक्रियामा गृह मन्त्रालय र सुरक्षासंस्थाहरू जुटेका छन् ।