काठमाडौं, २९ भदौ । जेनजी आन्दोलनमा ज्यान गुमाउनेलाई सरकारले शहीद घोषणा गर्ने निर्णय गरेको छ । साथै, प्रत्येक मृतकका परिवारलाई १० लाख रुपैयाँको दरले राहत उपलब्ध गराउने घोषणा गरिएको छ ।

आइतबार पदभार ग्रहण गरेलगत्तै प्रधानमन्त्री सुशीला कार्कीले पहिलो निर्णयका रूपमा सो निर्णयमा हस्ताक्षर गरेकी हुन् । यसबारे जानकारी मुख्य सचिव एकनारायण अर्यालले सार्वजनिक गरेका हुन् ।

उनका अनुसार आन्दोलनका क्रममा ५९ जना प्रदर्शनकारी, १० जना कैदीबन्दी र ३ जना सुरक्षाकर्मी गरी ७२ जनाको ज्यान गएको छ । यस्तै १३४ जना प्रदर्शनकारी र ५७ जना प्रहरी घाइते भएका छन् ।

भदौ २३ गतेबाट सुरु भएको भ्रष्टाचारविरोधी र सामाजिक सञ्जालमाथिको प्रतिबन्धविरुद्धको जेनजी आन्दोलन हिंसात्मक मोड लिँदा ठूलो संख्यामा जनधनको क्षति भएको थियो । मृतकलाई शहीद घोषणा गर्ने सरकारी निर्णयले आन्दोलनका परिवारलाई केही राहत पुग्ने अपेक्षा गरिएको छ ।