काठमाडौं, २९ भदौ । जेनजी आन्दोलनका क्रममा मृत्यु हुनेको संख्या ७२ पुगेको छ । प्रधानमन्त्री सुशीला कार्कीको पदभार ग्रहण कार्यक्रममा आइतबार मुख्य सचिव एकनारायण अर्यालले औपचारिक जानकारी दिएका हुन् ।

उनका अनुसार आन्दोलनमा ज्यान गुमाउनेमध्ये ५९ जना प्रदर्शनकारी, १० जना कैदीबन्दी र ३ जना सुरक्षाकर्मी छन् । साथै, झडपका क्रममा १३४ जना प्रदर्शनकारी र ५७ जना प्रहरी घाइते भएका अर्यालले बताए ।

भदौ २३ गते भ्रष्टाचारविरुद्ध र सामाजिक सञ्जालमा लगाइएको प्रतिबन्धको विरोधमा युवाहरू सडकमा उत्रिएपछि प्रहरीसँग व्यापक झडप भएको थियो । त्यस क्रममा देशका विभिन्न भागमा आगजनी र हिंसात्मक घटना भएका थिए ।

प्रहरीको बल प्रयोग र आगलागीका घटनामा धेरैको ज्यान गएको अनुमान गरिएको छ । मृतकमध्ये सबैको सनाखत भइसकेको छैन । उद्धार र सफाइका क्रममा अझै शव भेटिने क्रम जारी छ । आज बिहान मात्र चाबहिल चुच्चेपाटीस्थित भाटभटेनी सुपरमार्केट परिसरमा ६ जनाको शव फेला परेको प्रहरीले जनाएको छ ।

मृतकको पहिचान, क्षतिको यथार्थ तथ्याङ्क र घटनाबारे विस्तृत विवरण जुटाउन सुरक्षाकर्मी र उद्धार टोली खटिएका छन् ।