काठमाडौं, २९ भदौ । राष्ट्रिय स्वतन्त्र पार्टी (रास्वपा) की नेता तथा पूर्वशिक्षामन्त्री सुमना श्रेष्ठले पार्टी परित्याग गरेकी छन् । आइतबार सामाजिक सञ्जालमार्फत् सार्वजनिक गर्दै उनले रास्वपा छोडेको घोषणा गरेकी हुन् ।

श्रेष्ठले पार्टी नेतृत्वलाई लक्षित गर्दै भनेकी छन्, ‘अब खुल्लारुपमा आक्रमण गर्ने हो भने पनि सजिलो बनाइदिएको छु । मनलाग्दी चलुन्जेल मनलाग्दी गर्नुहोला । मैले पार्टी छाडें ।’

उनले पार्टी केन्द्रीय समितिलाई लेखित जानकारीसमेत दिएकी छन् । सो पत्रमा उनले रास्वपा नेतृत्व लगातार गल्ती गर्दै आएको तर कहिल्यै गल्ती स्वीकार नगर्ने प्रवृत्ति देखिएकाले पार्टीबाट अलग हुने निर्णय लिएको स्पष्ट पारेकी छन् । श्रेष्ठका शब्दमा, ‘गल्तीमाथि गल्ती गरिरहने र त्यसको बोझ पार्टीका सबै सदस्यले बोकिदिनुपर्ने अवस्था अस्वीकार्य भयो ।’

श्रेष्ठले पार्टीभित्र आलोचनालाई सहने संस्कृतिको अभाव रहेको गुनासो पनि गरेकी छन् । उनको भनाइमा नेतृत्वले भित्रभित्र आलोचना गर्नेहरूलाई सार्वजनिक रूपमा ‘मिडिया ट्रायल’ गरेर दबाउने काम गर्ने गरेको छ । उनले थपिन्, ‘रास्वपाले देशभन्दा माथि पार्टी र पार्टीभन्दा माथि नेतालाई राख्न थालेको क्षणदेखि नै म आलोचना गर्दै आएकी हुँ ।’

यसअघि श्रेष्ठले रास्वपाको सह–महामन्त्री पदबाट पनि राजीनामा दिएकी थिइन् । त्यतिबेला उनले सांसद भएकाले पार्टी संगठनात्मक कामका लागि समय दिन नसक्ने भन्दै पद छाडेकी थिइन् । समानुपातिक प्रतिनिधित्वतर्फबाट सांसद बनेकी श्रेष्ठलाई प्रचण्ड नेतृत्वको सरकारले शिक्षामन्त्रीको जिम्मेवारी दिएको थियो ।

श्रेष्ठको राजीनामापछि रास्वपा भित्रको आन्तरिक विवाद पुनः सतहमा आएको छ । पार्टी नेतृत्वविरुद्ध असन्तुष्टि राख्ने नेताहरू खुलेर बोल्न थालेपछि रास्वपाले कस्तो कदम चाल्ने भन्ने विषयमा चासो बढेको छ ।