सप्तरी, २८ भदौ । सप्तरीको राजविराज कारागारबाट गत भदौ २५ गते फरार भएका एक कैदी मृत अवस्थामा फेला परेका छन् ।

सप्तकोसी नगरपालिका–१० सन्तपुरका ४० वर्षीय सन्तोष तामाङ शनिबार बिहान राजगढ गाउँपालिका–३ नर्घोमा रुखमा झुन्डिएको अवस्थामा भेटिएका हुन् ।

सप्तरीका प्रहरी प्रवक्ता प्रहरी नायव उपरीक्षक जीतेन्द्रकुमार बस्नेतले भने, ‘फरार तामाङलाई स्थानीयवासीले झुन्डिएको अवस्थामा फेला पारेका हुन् । शवलाई स्थानीय मुचुल्कासहित कानुनी प्रक्रिया पूरा गरेर राजविराजस्थित गजेन्द्रनारायण सिंह अस्पतालमा परीक्षणका लागि राखिएको छ ।’

कर्तव्य ज्यानको मुद्दामा २०७५ सालदेखि कैद सजाय भोगिरहेका तामाङलाई २५ वर्ष कैद सजाय तोकिएको थियो । उनले सात वर्ष कैद भोगिसकेका थिए ।

गत बुधबार राजविराज कारागारमा भएको आगजनीपछि मुख्य ढोका तोडफोड गरी करिब २ सय ५ जना कैदीबन्दी फरार भएका थिए । सो कारागारमा पुरुष कैदीका लागि ‘ए’ र ‘बी’ गरी दुई ब्लक र महिला कैदीका लागि छुट्टै ब्लकसहित कुल ३९७ जना कैदीबन्दी थिए ।

प्रहरीका अनुसार तामाङले आफ्नै जीवन अन्त्य गरेको प्रारम्भिक निष्कर्ष निकालिएको छ । तर, घटनाबारे थप छानबिन भइरहेको छ । डीएसपी बस्नेतका अनुसार फरार अन्य कैदीहरूको खोजी कार्य व्यापक रूपमा जारी छ । उनले भने, ‘स्थानीय प्रशासन र प्रहरी टोली सक्रिय रूपमा परिचालित छन् । फरार कैदीको सुरक्षाबारे समुदायलाई पनि सतर्क रहन आग्रह गरिएको छ ।’

सुरक्षा निकायले भने सम्पूर्ण फरार कैदीलाई शीघ्र नियन्त्रणमा लिन प्रयासरत रहेको र आवश्यक छानबिनपछि मात्र तामाङको मृत्युको वास्तविक कारण सार्वजनिक गरिने जनाएको छ ।