पर्सा, २८ भदौ । वरिष्ठ पत्रकार एवम् मधेश मामिलाका जानकार चन्द्रकिशोर झाका पिता राजेन्द्र झाको शनिबार वीरगंजस्थित निवासमा ९२ वर्षको उमेरमा निधन भएको छ । यो जानकारी पत्रकार चन्द्रकिशोरले पुष्टि गरेका छन् ।

केही समयदेखि पिसाबसम्बन्धी रोगसँग जुध्दै आएका राजेन्द्र झा पर्साको वीरगंजस्थित घरमै बस्दै आएका थिए ।

आफ्ना पिता उपचारपछि घरमै राखेका थिए र विगत अढाई–तीन महिनादेखि चन्द्रकिशोर स्वयं बुवाको हेरचाहमा लागि रहेका थिए ।

चन्द्रकिशोरले भने, ‘पिसाबसम्बन्धी समस्या थियो, उपचारपछि वीरगंजस्थित घरमै राखेका थियौँ । विगत अढाई–तीन महिनादेखि बुवाकै सेवामा म आफैँ लागेको थिएँ, आज उहाँको स्वर्गवास भयो ।’

राजेन्द्र झा रौतहटका निवासी हुन् र स्थानीय सामाजिक क्षेत्रमा पनि सक्रिय व्यक्ति मानिन्थे । परिवार र आफन्तहरूले उनलाई श्रद्धाञ्जलि अर्पण गरेका छन् ।