जनकपुरधाम, २९ भदौ । देशले अन्तरिम प्रधानमन्त्री पाएसँगै क्रमशः शान्ति फर्किन थालेको छ । मधेश प्रदेशको राजधानी जनकपुरधाममा पनि जनजीवन सामान्यतर्फ उन्मुख बन्दै गएको छ । जेनजी पुस्ताको आन्दोलनका क्रममा जलेर ध्वस्त भएका प्रहरी चौकीहरू शनिबारदेखि पुनः सञ्चालनमा ल्याउने कार्य शुरु भएको छ ।

बिहानैदेखि विभिन्न स्थानका स्थानीयवासीले ध्वस्त प्रहरी चौकीहरू सरसफाइ गरी पुनः सञ्चालन गर्ने पहल थालेका छन् । आन्दोलनका क्रममा आगजनी र लुटपाटका कारण प्रहरी चौकी र कार्यालयहरूमा ठूलो क्षति भएको थियो ।

जनकपुरधामस्थित जिल्ला ट्राफिक प्रहरी कार्यालयमा सरसफाइ अभियान तीव्रगतिमा भइरहेको छ । कार्यालय प्रमुख सूर्यबहादुर शाहीका अनुसार स्थानीय युवाले बिहानैदेखि सहयोग गरेका छन् भने उपमहानगरपालिकाबाट दमकलसमेत मगाएर पूर्ण सरसफाइ गरिएको छ ।

‘कार्यालय सञ्चालन गर्न तत्काल प्रयास गरिरहेका छौँ । तर, पुनःनिर्माणका लागि सरकारी निकाय र स्थानीय दुवैको सहयोग अपरिहार्य छ,’ शाहीले भने । उनका अनुसार कार्यालयमा भएको क्षति पाँच करोड रुपैयाँभन्दा बढी छ । हाल कार्यालयका करिब ३५ जना कर्मचारी आफन्तकहाँ बस्न बाध्य छन् ।

आन्दोलनका क्रममा प्रहरीसँग रहेका ड्रेस, मोटरसाइकल र गाडी सबै जलेर नष्ट भएका छन् । कार्यालय परिसरमा रहेका दुई वटा चारचक्के गाडी र करिब दुई दर्जन मोटरसाइकल जलेका छन् । शाहीले भने, ‘गाडी र अन्य उपकरण त पछि पनि मिलाउन सकिन्छ । तर, ड्रेस तत्कालै आवश्यक छ ।’

जनकपुरधाम उपमहानगरपालिका–१ स्थित स्टेशन प्रहरी चौकी पनि स्थानीयको सहयोगमा सरसफाइ हुँदै पुनः सञ्चालनतर्फ फर्कन थालेको छ । चौकीका इन्चार्ज संजय तामाङका अनुसार चौकी पूर्ण रूपमा क्षतिग्रस्त भए पनि सहयोग र प्रतिबद्धताले पुनः सञ्चालन सम्भव हुने विश्वास गरिएको छ ।

उनले जनकपुरस्थित मोनास्टिक स्कुलले चौकी पुनःनिर्माणका लागि सहयोग गर्ने आश्वासन दिएको जानकारी दिए । चौकी परिसरमा रहेका करिब एक दर्जन चारचक्के गाडी र दुई दर्जन मोटरसाइकल जलेर नष्ट भएका छन् ।

जिल्ला प्रहरी कार्यालय धनुषाका प्रवक्ता तथा डीएसपी वरुणबहादुर सिंहका अनुसार जिल्लाभरि भएको क्षतिको यकिन विवरण अझै संकलन भइरहेको छ । तर, शनिबारसम्म आठ वटा प्रहरी चौकीमा इन्चार्जसहित टोली फर्किसकेको र ती चौकीहरूले सेवा सञ्चालन थालेको उनले जानकारी दिए ।

प्रहरी चौकी पुनः सञ्चालनसँगै जनकपुरधाममा शान्ति र सुरक्षाको वातावरण फर्कन थालेको छ । यद्यपि, आन्दोलनले पुर्याएको भौतिक क्षति पूर्णरूपमा मेटिन अझै लामो समय लाग्ने देखिन्छ ।

नगरवासीले पुनःस्थापनामा सक्रिय सहभागिता जनाएपछि जनकपुरधाम क्रमशः सामान्यतर्फ फर्किरहेको छ भने सुरक्षाको अवस्था पनि सुदृढ हुँदै गएको स्थानीय प्रशासनले जनाएको छ ।