जनकपुरधाम, २८ भदौ । डा. सिके राउत नेतृत्वको जनमत पार्टीका केन्द्रीय सचिव विशेश्वरप्रसाद साह (बीपी साह)माथि जबरजस्ती करणीको आरोप लागेका छन् । २०८१ चैत्र ३१ गते जिल्ला प्रहरी कार्यालय धनुषामा एक महिलाले साहमाथि आफूलाई जबरजस्ती करणी गरेको भन्दै जाहेरी दिएकी हुन् ।

जाहेरीमा जनकपुरधाम उपमहानगरपालिका निवासी २८ वर्षीया महिलालाई घरमा कोही नभएको बेला साहले अवसरको दुरुपयोग गर्दै यौन हिंसा गरेको आरोप लगाइएको छ । जाहेरी दर्ता भएसँगै प्रहरीले साहलाई फरार सूचीमा राखेको छ ।

तर, सामाजिक सञ्जालमा साह निरन्तर सक्रिय देखिएका छन् । उनी विगत एक हप्तादेखि विभिन्न कार्यक्रम र प्रदर्शनमा सहभागी भएका तस्बिरहरु सामाजिक सञ्जालमार्फत सार्वजनिक गर्दै आएका छन् ।

साह साविक रघुनाथपुर गाविस (हाल सबैला नगरपालिका–१२) मा बसोबास गर्दै आएका छन् । जिल्ला प्रहरी कार्यालय धनुषाले साहको तीन पुस्ते विवरण बुझ्न वडा कार्यालयलाई २०८२ भदौ ५ मा पत्र पठाएको थियो । पत्रमा दुई दिनभित्र विवरण उपलब्ध गराउन भनिएको छ ।

तर, वडा कार्यालयबाट प्राप्त जानकारी अनुसार वडाध्यक्ष रामनारायण अधिकारी बिरामी भएकाले कार्यालय उपस्थित नभएको र पत्रबारे पूर्ण जानकारी नभएको बताए । वडासचिव नन्द ठाकुरले जिल्ला प्रहरी कार्यालयको पत्र प्राप्त भएको तर जवाफ पठाइएको छ कि छैन भन्ने विषयमा आफूलाई जानकारी नभएको बताए ।

वडासचिव ठाकुरले पत्र प्राप्त भएको स्वीकार गरे पनि जवाफ वडाध्यक्षलाई मात्रै जानकारी भएको र प्रहरीसम्म पुगेको छैन भन्ने कुरा स्पष्ट पारेका छन् ।

प्रहरी स्रोतका अनुसार साहको खोजी प्रक्रिया तीव्र पारिएको छ र फरार व्यक्तिलाई चाँडै नियन्त्रणमा लिन प्रयास भइरहेको छ ।