जनकपुरधाम, २८ भदौ । जनकपुरधामका बौद्धिक वर्गको क्रियाकलापप्रति स्थानीय युवाले आक्रोश व्यक्त गरेका छन् ।

स्थानीय युवा हरिशंकर साहका अनुसार जनकपुरधामले धेरै अवसरहरू गुमाएको मुख्य कारण समाजका सचेत, पढे–लेखेका, बौद्धिक भनिने वर्गको निष्क्रियता हो ।

उनले भने, ‘हामीले नेताहरूलाई मात्र दोष दिनु पर्याप्त छैन । जसले सही–गलत छुट्याएर समाजलाई बाटो देखाउन सक्थ्यो, त्यो वर्ग मौन बस्यो । यही मौनताले अवस्था बिगार्यो ।’

साहले स्वास्थ्य, शिक्षा, सरसफाइ र न्यायिक प्रक्रियामा देखिएका समस्या औंल्याउँदै भने, ‘गरिबले उपचार गर्ने एक मात्र भर पर्ने प्रादेशिक अस्पतालको अवस्था आज पनि दयनीय छ । परीक्षा प्रणाली ध्वस्त छ । शहरमा अहिलेसम्म ल्यान्डफिल साइट बनाउन सकिएको छैन । न्यायालयमा नेताको हस्तक्षेपका कारण सर्वसाधारणलाई दैनिक समस्या भोग्नुपरेको छ । दलालहरूले हरेक कार्यालय भरिएको छ ।’

जनकपुरधाममा बौद्धिक वर्गको कमी छैन तर यिनीहरूले समयमा मार्गदर्शन गर्न सकेनन्, गलत भईरहेको बेला आवाज उठाउन सकेनन् वा रोक्न सकेनन् भन्ने आरोप स्थानीय युवाहरूले उठाएका छन् ।

साहका अनुसार यी समस्या केवल राज्यको कमजोरी मात्र नभई बौद्धिक वर्गले बेलामा हस्तक्षेप नगर्दा पनि बढेका हुन् । ‘राजनीतिक दलहरूले देशभन्दा पार्टी र कार्यकर्तालाई प्राथमिकता दिए । तर, जब यस्तो गलत निर्णय हुन्थ्यो, हाम्रो बौद्धिक वर्गले किन मौन साध्थ्यो ? किन सच्याउने प्रयास गरेनन् ?’ साहले प्रश्न गरे ।

युवाहरूले अब जनकपुरधामका सचेत वर्गलाई सक्रिय हुन आग्रह गरेका छन् । ‘समयले नेपालसँगै जनकपुरधामलाई पनि अघि बढ्ने मौका दिएको छ । यसपटक चुप लागेर बस्ने होइन, गलतको विरोधमा खुला रूपमा बोल्ने समय हो । बौद्धिक वर्गलाई समाजको दिशानिर्देशक बन्न आग्रह गर्दछु,’ हरिशंकरले भने ।