जनकपुरधाम, २७ भदौ । नेपाल पत्रकार महासंघ धनुषाले राष्ट्र र संविधानको रक्षाका लागि दबाबमूलक शान्तिपूर्ण प्रदर्शन गरेको छ ।

नेपाल पत्रकार महासंघ धनुषा शाखाले आयोजना गरेको प्रदर्शनमा पत्रकारहरूले विभिन्न सन्देश समेटिएका प्लेकार्ड बोकेर सरकार र राजनीतिक दलहरूलाई सचेत गराए ।

प्रदर्शनमा सहभागी पत्रकारहरूले भने, ‘हामी प्रेस स्वतन्त्रता र कानूनी संविधानको सम्मान सुनिश्चित गर्न प्रतिबद्ध छौँ । लोकतान्त्रिक व्यवस्थालाई कमजोर बनाउने कुनै पनि प्रयास सह्य हुने छैन ।’

नेपाल पत्रकार महासंघ धनुषाका अध्यक्ष पुरन साहले वर्तमान राजनीतिक परिस्थितिले राष्ट्रिय एकता र संवैधानिक मूल्यहरूमा चुनौती पुर्याइरहेको भन्दै आफुहरूले शान्तिपूर्ण तर दबाबमूलक तरिकाले आवाज उठाएको बताए ।

प्रदर्शनका क्रममा सहभागी पत्रकारहरूले ‘राष्ट्र र संविधानको रक्षा गर’, ‘जनताको अधिकार सुरक्षित रहोस्’ लगायतका नारा लेखिएका प्लेकार्डहरू प्रदर्शन गरेका थिए । स्थानीय प्रशासनसँग सहकार्य गर्दै प्रदर्शन शान्तिपूर्ण ढंगले सम्पन्न भएको थियो ।

नेपाल पत्रकार महासंघ धनुषाले यस किसिमको सक्रियताको आवश्यकता वर्तमान संवैधानिक र राजनीतिक परिस्थितिका कारण भएको बताउँदै भविष्यमा पनि प्रेस स्वतन्त्रता र संवैधानिक मर्यादाको रक्षा गर्न निरन्तर प्रयास गर्ने प्रतिबद्धता व्यक्त गरेको छ ।