काठमाडौं, २७ भदौ । नवनियुक्त प्रधानमन्त्री सुशीला कार्कीको सिफारिसमा राष्ट्रपति रामचन्द्र पौडेलले प्रतिनिधिसभा विघटन गरेका छन् ।

शुक्रबार राति पद तथा गोपनीयताको शपथ ग्रहण समारोहपछि शीतलनिवासमा बसेको अन्तरिम मन्त्रिपरिषद्को पहिलो बैठकबाट संसद् विघटनको सिफारिस प्रधानमन्त्री कार्कीले राष्ट्रपतिसमक्ष पेश गरेकी हुन् । राष्ट्रपति रामचन्द्र पौडेलले यसलाई स्वीकार गरी हस्ताक्षर गरिसकेका छन् ।

प्रधानमन्त्री कार्कीको अन्तरिम मन्त्रिपरिषदमा अन्य सदस्य नियुक्त नभएकाले उनी एक्लैको बैठकले संसद् विघटनको निर्णय गरेकी हुन् । यसबारे उनले भनिन्, ‘सदन विघटन भइसकेको छ । मैले सिफारिस गरेँ र राष्ट्रपतिले स्वीकार गरी हस्ताक्षर गर्नुभएको छ । भोलि वा पर्सि बसेर मन्त्रिपरिषद् विस्तारको विषयमा सल्लाह गर्नेछौँ ।’

कार्कीले संसद् विघटनको निर्णय ३–४ दिनको तयारी र छलफलपछि गरेको पनि स्पष्ट पारिन् । उनले थपिन्, ‘अहिलेको निर्णयले देशमा नयाँ राजनीतिक व्यवस्थापनको बाटो खोल्नेछ । अब नयाँ जनादेशका लागि आवश्यक प्रक्रिया अगाडि बढाइनेछ ।’

संसद् विघटनको प्रस्ताव कार्कीको प्रधानमन्त्री नियुक्ति अघि नै राष्ट्रपति र सबै पक्षबीच सहमति बनेको थियो । यसरी विघटन भएको संसद् प्रतिनिधिसभाको नयाँ निर्वाचन ६ महिनाभित्र सम्पन्न गराउने जिम्मेवारी प्रधानमन्त्री कार्कीलाई दिइएको छ ।

संसद् विघटनसँगै अब देशमा नयाँ निर्वाचन तयारी र आगामी राजनीतिक रणनीतिहरूमा सबैको ध्यान केन्द्रित भएको छ । आगामी दिनमा प्रधानमन्त्री कार्कीले मन्त्रिपरिषद् विस्तारसहित अन्य कार्ययोजना अघि बढाउने छिन् ।

त्यस्तै, फागुन २१ गतेका लागि चुनावको मितिसमेत तोकिएको छ । प्रधानमन्त्री कार्कीको सिफारिसमा राष्ट्रपतिले चुनावको मिति घोषणा गरेका हुन् ।