जनकपुरधाम, २७ भदौ । तोडफोड र आगजनीबाट क्षतिग्रस्त भएपछि स्थगित गरिएको धनुषा जिल्ला प्रशासन कार्यालयको सेवा आइतबारदेखि सुचारु हुने भएको छ ।

कार्यालयले शुक्रबार सूचना जारी गर्दै राहदानी र राष्ट्रिय परिचयपत्रसम्बन्धी सेवा बाहेकका सबै कामकाज नियमित हुने जनाएको हो ।

सहायक प्रमुख जिल्ला अधिकारी उमेशकुमार दाहालका अनुसार शान्ति–सुरक्षा, विपद् व्यवस्थापन तथा मुद्दा–मामिला सम्बन्धी सेवासहितका अन्य कार्यहरू नियमित रूपमा सञ्चालन हुनेछन् । उनले भने, ‘आइतबारदेखि कार्यालयका नियमित सेवामा कुनै अवरोध रहने छैन । तर, राहदानी र राष्ट्रिय परिचयपत्रसम्बन्धी सम्पूर्ण सेवाहरू अर्को व्यवस्था नहुँदासम्म बन्द रहनेछन् ।’

गत मंगलबार जेनजी आन्दोलनका क्रममा प्रदर्शनकारीहरूले विभिन्न सरकारी कार्यालय र नेताहरूको घरमा तोडफोड र आगजनी गरेका थिए । सोही क्रममा जिल्ला प्रशासन कार्यालय धनुषा पनि क्षतिग्रस्त बनेपछि सेवाप्रवाह अस्थायी रूपमा रोकिएको थियो ।